ÜÇ AZƏRBAYCAN CÜDOÇUSU DÜNYA KUBOKUNUN FİNALINDA
AZƏRTAC xəbər verir ki, dünya kuboku turnirində yarımfinal qarşılaşmaları başa çatmışdır. Samir Dadaşzadənin (60 kq) ardınca, kişilərin yarışında daha bir Azərbaycan cüdoçusu Samir İsmayılov (73 kq) turnirin finalına yüksəlmişdir. S.İsmayılov bu uğura ardıcıl olaraq litvalı Ainis Vençeviçus, gürcüstanlı Tengiz Papoşvili, yarımfinalda isə Belarus təmsilçisi Aleksey Stauşevə qalib gəlməklə nail olmuşdur. Qızıl medal uğrunda Azərbaycan cüdoçusunun rəqibi ukraynalı Vladimir Soroka olacaqdır.
Bu çəki dərəcəsində isə Elçin Qasımov bürünc medal uğrunda Aleksey Stauşevlə qarşılaşacaqdır.
66 kiloqram çəki dərəcinsdə iki Azərbaycan cüdoçusu üçüncü yer uğrunda döyüşəcəklər. Emil Həsənov Vano Davitaşvili (Gürcüstan), Tərlan Kərimov isə Vladimir Roqalski (Ukrayna) ilə qarşılaşacaqlar.
Qadın cüdoçuların yarışında Azərbaycan yığmasının heyətində 48 kiloqram çəki dərəcəsində Svetlana Məmmədova finalda ukraynalı Marina Çernyak ilə üz-üzə gələcəkdir.
Bu çəki dərəcəsində Giləxanım Ələkbərova ilə Ayişə Qurbanlı üçüncü yer uğrunda mübarizə aparacaqlar.
63 kiloqram çəki dərəcəsində Gözəl Zutova və Nailə Yusubova bürünc medal uğrunda bir-biri ilə görüşəcəklər. Bu çəkidə daha bir bürünc medalın sahibi azərbaycanlı Elmira Mustafayeva ilə ukraynalı Nataliya Malikova arasındakı qarşılaşmadan sonra məlum olacaqdır.
Bölmənin digər xəbərləri
