Ukrayna DİN: Kiyevdə bankı tutan Özbəkistan vətəndaşıdır
Kiyev, 3 avqust, AZƏRTAC
Kiyevdə bomba partlatmaqla hədələyən şəxs Özbəkistan vətəndaşıdır. Hüquq mühafizəçiləri onun kimliyini öyrənirlər.
AZƏRTAC xəbər verir ki, bu barədə daxili işlər naziri Anton Geraşşenko bəyan edib.
Nazir müavini qeyd edib ki, heç kəsin zərər çəkməməsi üçün polislər nə mümkündürsə edəcəklər. Onlar çalışacaqlar ki, terrorçu özünə xətər yetirmədən təslim olsun.
Anton Geraşşenko deyib: “Bu şəxs ukraynalı deyil, o, Özbəkistan vətəndaşıdır”.
İlkin məlumata görə, terror aktını törədən Özbəkistan vətəndaşı 1988-ci il təvəllüdlü Suxrob Rəhmonoviç Kərimovdur.
Anton Geraşşenko qeyd edib ki, Kərimovun sosial şəbəkələrdə yerləşdirdiyi akkauntlara əsasən onun psixi cəhətdən xəstə adam olduğunu güman etməyə əsas var. Hazırda hüquq mühafizəçiləri onunla danışıqların strategiyasını seçiblər. “Bumeranq” adlı xüsusi əməliyyat planı işə salınıb.
Xatırladaq ki, bu gün gündüz saat 12:00 radələrində naməlum şəxs “Universal Bank”ın “Leonardo” biznes mərkəzindəki şöbəsini zəbt edib. Onun sözlərinə görə, portfelində bomba var və həmin bombanı partladacağı ilə hədələyir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
