Ukraynada koronavirusla bağlı vəziyyət mayın 11-dən karantin tədbirlərinin yüngülləşdirilməsinə imkan verir
Kiyev, 1 may, AZƏRTAC
Ukraynanın Səhiyyə naziri Maksim Stepanov COVID-19 koronavirusunun yayılmasının qarşısının alınması məqsədilə ölkədə tətbiq olunan karantinin ləğvinə başlamaq üçün hazırda əlverişli epidemik vəziyyətin mövcudluğunu bəyan edib.
AZƏRTAC xəbər verir ki, nazir bu barədə brifinq zamanı bildirib.
Onun sözlərinə görə, karantin tədbirləri Ukraynada koronavirusa yoluxmanın pik həddə çatmasının qarşısını almağa şərait yaradıb və bu günə olan vəziyyət karantin məhdudiyyətlərinin mayın 11-dən yüngülləşdirilməsinə başlamağa imkan verəcək.
Qeyd edək ki, bu həftə Ukrayna hökuməti bazarlarda insanlar arasında təhlükəsiz distansiyaya və fərdi qorunma vasitələrinə dair sanitar normalara ciddi riayət olunmaq şərti ilə 800-dən çox bazarın açılmasına icazə verib.
Ukrayna Səhiyyə Nazirliyinin son məlumatına görə, ölkədə koronavirusa 10861 yoluxma halı qeydə alınıb. Bunlardan 1413 nəfər sağalıb, 272 nəfər xəstəliyin qurbanı olub.
Rüstəm Məmmədov
Kiyev
Bölmənin digər xəbərləri
