Ümummilli lider Heydər Əliyevə sonsuz məhəbbət və ehtiramın parlaq təcəssümü
Astara, 11 may, Bağır Əliyev, AZƏRTAC
Azərbaycan xalqının ümummilli lideri Heydər Əliyevin anadan olmasının 95-ci ildönümü münasibətilə Astara, Lənkəran, Masallı və Lerik rayonlarında keçirilən tədbirlər dahi rəhbərə sonsuz məhəbbət və ehtiramın parlaq təcəssümünə çevrilib.
AZƏRTAC xəbər verir ki, Astarada yaşlı nəslin və gənclərin nümayəndələri, ictimaiyyət nümayəndələri, şəhər sakinləri Ulu Öndərin abidəsi önünə əklil və gül dəstələri düzərək xatirəsini ehtiramla yad ediblər.
Tədbir iştirakçıları Astara şəhərindəki Heydər Əliyev Mərkəzində Ulu Öndərin zəngin və mənalı ömür yolunu əks etdirən eksponatlar və fotoşəkillərlə tanış olublar. Sonra “Heydər Əliyev və müasir müstəqil Azərbaycan dövləti” mövzusunda elmi-praktiki konfrans keçirilib. Rayon icra hakimiyyətinin başçısı Qəzənfər Ağayev ümummilli lider Heydər Əliyevin Azərbaycan xalqı və dövləti qarşısındakı əvəzsiz xidmətlərindən danışıb.
Elmi-praktiki konfransda Astara Rayon Mərkəzi Xəstəxanasının həkimi Aliyə Cavadova, YAP Astara rayon təşkilatı Gənclər Birliyinin sədri Tural Eyvazov, Kijəbə qəsəbə sakini Əminə Həsənova, “Sun Tea çay fabriki” MMC-nin Astara çay fabrikinin icraçı direktoru Nizami Rəsulov və başqaları çıxış edərək ulu öndər Heydər Əliyevin ölkəmiz üçün böyük işlər gördüyünü, Astaraya daim diqqət və qayğı göstərdiyini bildiriblər.
Siyaku kənd tam orta məktəbinin XI sinif şagirdi, “Ən yaxşı təqdimat” respublika müsabiqəsinin qalibi Nazənin Fətəlizadənin Ümummilli Lider haqqında təqdimat nitqi iştirakçılar tərəfindən alqışlarla qarşılanıb.
Dənizkənarı park-bulvarda konsert proqramı ilə davam edən tədbirdə Əməkdar Artist Baloğlan Əşrəfov və digər tanınmış musiqiçilər çıxış ediblər.
Ulu Öndərin anadan olmasının 95-ci ildönümü ilə bağlı Astara şəhərindəki digər tədbir Heydər Əliyev Parkında reallaşan “Kitab bayramı” olub. Tədbir çərçivəsində “Astara - doğma diyar”, “Dahi rəhbərimiz”, “Ümummilli liderin layiqli davamçısı”, “Astara yazarları”, “Alnımım yazısı Vətən”, “Yeni kitablarımız”, “Azərbaycan Xalq Cümhuriyyəti-100”, “Dünya xalqlarının nağılları”, “Göydən üç alma düşdü”, “Bizim nağıl dünyamız” və digər mövzularda 1000-dən çox kitab nümayiş etdirilib.
Tədbir Astara Rayon Mədəniyyət Mərkəzinin “Sevinc” mahnı və rəqs ansamblının və Astara Uşaq Musiqi Məktəbinin hazırladığı konsert proqramı ilə davam edib.
X X X
AZƏRTAC xəbər verir ki, Lənkəran şəhərində Ulu Öndərin adını daşıyan Xatirə Parkında Ümummilli Liderin abidəsi önünə gül düzülüb, xatirəsi ehtiramla yad edilib.
Mərasim iştirakçıları Heydər Əliyev Mərkəzində Ümummilli Liderin zəngin və mənalı ömür yolunu əks etdirən eksponatlar və fotoşəkillərlə tanış olublar.
X X X
AZƏRTAC xəbər verir ki, Masallı rayonunun sakinləri Heydər Əliyev Parkına gələrək böyük rəhbərə sonzuz sevgi və məhəbbətlərini nümayiş etdiriblər. Müharibə və əmək veteranları, idarə, müəssisə və təşkilatların, ictimaiyyət nümayəndələri Ümummilli Liderin abidəsi önünə gül dəstələri düzərək xatirəsini ehtiramla yad ediblər.
X X X
AZƏRTAC xəbər verir ki, Lerik rayonunda Ulu Öndərin abidəsi ziyarət edilib, abidə önünə tər çiçəklər düzülüb.
Ümummilli Liderin anadan olmasının 95-ci ildönümünə həsr olunmuş konfransın iştirakçıları Mərkəzləşdirilmiş Kitabxana Sisteminin qarşısındakı meydanda Heydər Əliyevin müstəqil Azərbaycanın inkişafındakı rolundan, ictimai-siyasi fəaliyyətindən bəhs edən kitablardan ibarət sərgi ilə tanış olub, Mədəniyyət Mərkəzində “Əbədi lider”adlı qısametrajlı sənədli filmə baxıblar.
Konfransda çıxış edən rayon icra hakimiyyətinin başçısı Rövşən Bağırov bildirib ki, dünya şöhrətli siyasətçi, müdrik dövlət xadimi Heydər Əliyevin anadan olmasının 95-ci ildönümü respublikanın hər yerində olduğu kimi, Lerikdə də bayram əhvali-ruhiyyəsi ilə qeyd edilir.
Tədbirdə “Heydər Əliyev Azərbaycan dövlətinin memarıdır”, “Heydər Əliyev və hüquqi dövlət quruculuğu”, “Heydər Əliyev-ağsaqqallar ağsaqqalı”, “Heydər Əliyevin Azərbaycan təhsilinin inkişafındakı rolu” “Heydər Əliyev və Azərbaycan səhiyyəsi” və “Heydər Əliyev və Azərbaycan gəncliyi” mövzularında məruzələr dinlənilib.
Sonra Yeni Azərbaycan Partiyasının Əliabad ərazi ilk partiya təşkilatının sədri Əkrəm Abdullayev Ulu Öndər haqqında xatirələrini bölüşərək ona həsr etdiyi “Sənsən xilaskar” şeirini oxuyub.
Bölmənin digər xəbərləri
