ÜMUMMİLLİ LİDERİMİZ HEYDƏR ƏLİYEVİN 85 İLLİYİNƏ HƏSR OLUNMUŞ TƏDBİR
Mayın 6-da Azərbaycan Respublikasının Prezidenti yanında Dövlət İdarəçilik Akademiyasında (DİA) ümummilli liderimiz Heydər Əliyevin anadan olmasının 85 illiyinə həsr edilmiş “Heydər Əliyevin dövlət idarəçilik təcrübəsi idarəetmə kadrlarının hazırlanmasında zəngin mənbədir” mövzusunda tədbir keçirilmişdir.
DİA-dan AZƏRTAC-a bildirmişlər ki, rəhbər kadrların ixtisasının artırılması fakültəsi müdavimlərinin iştirak etdikləri tədbirdə akademiyanın rektoru, əməkdar elm xadimi, professor Seyfəddin Qəndilov türk dünyasının böyük oğlu Heydər Əliyevin Azərbaycan xalqı qarşısındakı tarixi xidmətlərini xatırlatmış, müdrik rəhbərimizin ideyalarının Prezident İlham Əliyev tərəfindən uğurla həyata keçirildiyini diqqətə çatdırmışdır.
Ümummilli liderimizin zəngin siyasi irsinin əhəmiyyətini vurğulayan rektor, bu irsin nəsillərə daim ən layiqli örnək olduğunu söyləmişdir.
Tədbirdə dosent Bayram Haqverdiyev Heydər Əliyevin dövlətçilik və idarəçilik siyasətinin respublikamızın ictimai-siyasi həyatındakı rolundan danışmışdır.
Sonra “Heydər Əliyevin Azərbaycan Respublikasında vətəndaş cəmiyyətinin formalaşmasında rolu”, “Heydər Əliyevin dövlət idarəçiliyində siyasi varislik”, “Heydər Əliyev və Azərbaycan iqtisadiyyatı” və digər mövzularda məruzələr dinlənilmiş, fikir mübadiləsi aparılmışdır.
Məruzə və çıxışlarda qüdrətli şəxsiyyət Heydər Əliyevin liderlik məharətindən, dövlət idarəçiliyi sahəsində zəngin təcrübəsindən bəhs edilmişdir.
Bölmənin digər xəbərləri
