UNİVERSİTETDƏ ELMİ KONFRANS KEÇİRİLMİŞDİR
Universitetin rektoru, akademik İsa Həbibbəyli konfransı açmış və görkəmli alimin həyat və fəaliyyəti barədə geniş məlumat vermişdir.
Tibb fakültəsi ümumi təbabət kafedrasının müdiri, tibb elmləri namizədi Məlikəjdər İbrahimov Azərbaycanda oftalmologiya elminin inkişafında Zərifə xanım Əliyevanın misilsiz xidmətlərindən, bir vaxtlar ölkəmizdə geniş yayılmış traxoma xəstəliyinin kökünün kəsilməsindəki rolundan, oftalmologiya elminə bəxş etdiyi yeniliklərdən, elmi kəşflərinin böyük əhəmiyyətindən danışmışdır. O qeyd etmişdir ki, oftalmologiyanın problemlərindən bəhs edən 140-dan çox elmi əsərin, 10 monoqrafiyanın, 12 səmərəli təklifin müəllifi olan görkəmli alim Zərifə Əliyevanın elmi irsi göz həkimləri üçün bu gün də əvəzsiz məxəzdir.
Konfransda çıxış edən müəllim və tələbələr bildirmişlər ki, vaxtsız əcəlin aramızdan apardığı bu əvəzsiz insanın, görkəmli alimin əziz xatirəsi təkcə şəfqətli əllərindən dünya işığına qovuşan minlərlə insanın deyil, bütün Azərbaycan xalqının qəlbində əbədi olaraq yaşayacaqdır.
Konfrans iştirakçıları sonra universitetdə təşkil edilmiş Zərifə xanım Əliyevanın həyat və fəaliyyətini əks etdirən fotostend və kitablar sərgisi ilə yaxından tanış olmuşlar.
