Uşaq hüquqlarının həyata keçirilməsinə dair elektron məlumat bankının istifadəçiləri ilə müzakirələr aparılıb
Naxçıvan, 28 yanvar, AZƏRTAC
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsində muxtar respublikada uşaq hüquqlarının həyata keçirilməsinə dair elektron məlumat bankının mövcud vəziyyəti müzakirə edilib, qarşıya çıxan məsələlərin həlli yolları diqqətə çatdırılıb.
Komitənin mətbuat xidmətindən AZƏRTAC-ın Naxçıvan bürosuna bildirilib ki, iclasda komitə sədri Ramilə Seyidova çıxışında muxtar respublikada dövlət uşaq siyasəti sahəsində əldə edilən uğurlardan danışıb. Bildirib ki, Naxçıvan Muxtar Respublikasında sayı 165 min 228 olan və əhalinin 36 faizini təşkil edən uşaqlarla bağlı dövlət siyasəti uğurla həyat keçirilir. Belə ki, uşaqların hüquqlarının və sağlamlıqlarının qorunması, sosial müdafiəsinin gücləndirilməsi, onların təhsili, intellektual, fiziki və psixoloji inkişafının təmin edilməsi, hərtərəfli şəxsiyyət kimi formalaşması ilə əlaqədar məqsədyönlü tədbirlər həyata keçirilir. Həmçinin müvafiq sahə ilə bağlı mütəmədi olaraq qanunvericilik bazası təkmiləşdirilir, dövlət proqramları qəbul olunur.
“Naxçıvan Muxtar Respublikası Ali Məclisi Sədrinin 2012-ci il 24 may tarixli Fərmanı ilə “Naxçıvan Muxtar Respublikasında uşaq hüquqlarının həyata keçirilməsinə dövlət nəzarəti Qaydası” təsdiq edilib. Fərmanın icrası ilə əlaqədar Naxçıvan Muxtar Respublikası Nazirlər Kabinetinin 2013-cü il 23 yanvar tarixli Qərarı ilə təsdiq olunmuş “Naxçıvan Muxtar Respublikasında uşaq hüquqlarının həyata keçirilməsinə dair elektron məlumat bankının təşkili və aparılması Qaydası”na uyğun olaraq muxtar respublikada elektron məlumat bankı yaradılıb”, - deyən Ramilə Seyidova qeyd edib ki, 2016-cı ildən elektron məlumat bankı istifadəyə verilib. 2019-cu ildə isə bankın proqram təminatı təkmilləşdirilərək aid təşkilatların istifadəsinə verilib.
Komitə sədri bildirib ki, “Uşaq hüquqlarının həyata keçirilməsinə dair elektron məlumat bankının təşkili və aparılması Qaydası”na Naxçıvan Muxtar Respublikası Nazirlər Kabinetinin 2020-ci il 26 dekabr tarixli 214 nömrəli Qərarı ilə əlavə və dəyişikliklər edilib, muxtar respublikanın İcbari Tibbi Sığorta üzrə Dövlət Agentliyi bankın istifadəçiləri sırasına daxil edilib. Bankın administratoru təyin edilmiş Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən uşaqlar haqqında daxil edilən fərdi məlumatlara mütəmadi olaraq nəzarət olunur və onlar üzərində təhlillər aparılır.
Uşaq hüquqlarının həyata keçirilməsinə dair elektron məlumat bankının əhəmiyyətindən, istifadəçilərin üzərinə qoyulan vəzifələrin öhdəsindən layiqincə gəlməyin vacibliyini vurğulayan komitə sədri bildirib ki, hazırda banka istifadəçilər tərəfindən 32 mindən çox uşaq haqqında fərdi məlumat daxil edilib və onlar üzərində təhlillər aparılıb. 2020-ci il ərzində banka uşaq haqqında fərdi məlumatların daxil edilməsi üçün 8 min 403 yeni anket açılıb və müvafiq məlumatlar daxil edilib. Ümumilikdə isə banka 32 min 766 uşaq haqqında fərdi məlumatlar işlənib ki, bunlardan da 30 min 7-si uşaq haqqında fərdi məlumatların olduğu aktiv anketlərdir. 2020-ci il ərzində 15 min 681-i Naxçıvan Muxtar Respublikasının Gənclər və İdman Nazirliyi, 8 min 994-ü Daxili İşlər Nazirliyi, 6 min 887-si Təhsil Nazirliyi, 2 min 566-sı Səhiyyə Nazirliyi, 814-ü Dövlət Sosial Müdafiə Fondu, 251-i Əmək və Əhalinin Sosial Müdafiəsi Nazirliyi, 40-ı Dövlət Miqrasiya Xidməti, 255-i Naxçıvan şəhər, 436-sı Şərur rayon, 1201-i Babək rayon, 718-i Ordubad rayon, 413-ü Culfa rayon, 1248-i Şahbuz rayon, 339-u Kəngərli rayonu, 284-ü isə Sədərək Rayon İcra hakimiyyətləri tərəfindən uşaqlar haqqında müvafiq fərdi məlumatlar elektron məlumat bankına daxil edilib. Ramilə Seyidova çatışmazlıqları da diqqətə çatdırıb.
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi Aparatının Uşaq problemləri şöbəsinin baş məsləhətçisi Müşərrəf Bağırova tərəfindən məlumatların qanunamüvafiq daxil edilməsi qaydası və təhlillər zamanı aşkarlanan çatışmazlıqlar əyani şəkildə nümayiş olunub.
Sonra istifadəçiləri maraqlandıran suallar cavablandırılıb.
Bölmənin digər xəbərləri
