UŞAQ PROBLEMLƏRİ MÜZAKİRƏ OLUNMUŞDUR
Dövlət Komitəsinin sədri Hicran Hüseynova xüsusi qayğıya ehtiyacı olan uşaqların problemləri ilə bağlı qurumun üzərinə düşən vəzifələrdən danışmışdır. O, uşaqların normal şəraitdə yaşaya bilmələri üçün onların hər cəhətdən təmin olunmasının vacibliyini, gündəlik həyatda təhlükə ilə üzləşən əlil, problemli ailələrdən olan uşaqlara və uşaq alverinin qurbanlarına başqalarına nisbətən daha çox diqqət tələb olunduğunu diqqətə çatdırmışdır. Bildirmişdir ki, rəsmi statistikaya görə, belə uşaqların sayı sürətlə artmaqdadır və bu problemi aradan qaldırmaq üçün dövlət müavinətinin təyin edilməsi mexanizmi tezliklə həyata keçirilməlidir. Uşağın əlillik dərəcəsindən asılı olmayaraq, əsas təhsil sisteminə qoşulması ilə əlaqədar tədbirlər reallaşmalıdır.
Milli Məclisin sosial siyasət daimi komissiyasının sədri Hadi Rəcəbli, təhsil nazirinin müavini İradə Hüseynova, mədəniyyət və turizm nazirinin müavini Sevda Məmmədəliyeva, Nazirlər Kabinetinin şöbə müdiri Qurban Sadıqov və başqaları müvafiq dövlət qurumlarının xüsusi qayğıya ehtiyac duyan, habelə sağlamlığı məhdud olan uşaqların problemləri ilə bağlı həyata keçirdikləri tədbirlər barədə məlumat vermişlər.
Konfransda hökumətin, cəmiyyətin və beynəlxalq təşkilatların diqqətinin xüsusi qayğıya ehtiyacı olan uşaqların cəmiyyətə inteqrasiyasına, bu uşaqlarla işləyən icma əsaslı mərkəzlərin fəaliyyətinə və onların inklüziv təhsil proqramlarına cəlb edilməsinin vacibliyi vurğulanmışdır.
