Vəkillər “Elektron məhkəmə” informasiya sistemi ilə bağlı təlimlərə cəlb olunurlar
Bakı, 22 yanvar, AZƏRTAC
Ölkəmizdə aparılan məhkəmə-hüquq islahatları çərçivəsində vətəndaşların ədalət mühakiməsinə çatımlılığının, o cümlədən məhkəmələrin fəaliyyətinin səmərəliliyinin artırılması məqsədilə uzun müddətdir ki, “Elektron məhkəmə” informasiya sistemi fəaliyyət göstərir.
Dövlətimizin başçısının “Azərbaycan Respublikasında vəkilliyin inkişafı ilə bağlı əlavə tədbirlər haqqında” 2018-ci il 22 fevral tarixli Sərəncamında Vəkillər Kollegiyasına vəkillərin fəaliyyətində müasir informasiya-kommunikasiya texnologiyalarının tətbiqini və hüquqi xidmətlərin elektron formada göstərilməsi təcrübəsini genişləndirmək üçün vəkilliyin vahid elektron informasiya sisteminin təşkili və bu sistemin “Elektron məhkəmə” informasiya sisteminə inteqrasiyası istiqamətində tədbirlər görülməsi tövsiyə edilib.
Vəkillər Kollegiyasından AZƏRTAC-a bildiriblər ki, qeyd olunan sistem məhkəmələrdə işlərə baxılmasını sürətləndirmək, informasiyaya çatımlılıq, məlumatların səmərəli şəkildə sistemləşdirilməsi və təhlili, eləcə də vətəndaşların əlavə əmək və vaxt sərf etmədən məhkəmələrə müraciət edə bilməsi baxımından mühüm əhəmiyyət kəsb edir.
“Elektron məhkəmə” informasiya sistemi Vəkillər Kollegiyası üzvlərinə də elektron qaydada məhkəməyə müraciət etmək, işə əlavə sübutlar təqdim etmək, dövlət rüsumu ödəmək, icraatlarında olan məhkəmə işlərini asanlıqla izləmək və sair imkanlar gətirib.
Məlum olduğu kimi, qanunvericiliyə edilmiş son dəyişikliklərlə bir qrup işlərlə bağlı məhkəməyə müraciət, habelə dövlət rüsumlarının ödənilməsi yalnız elektron qaydada həyata keçirilə biləcək.
Vəkillər Kollegiyası üzvlərinin sözügedən sistemdən istifadəsinin təmin edilməsi məqsədilə Azərbaycan Respublikası Ədliyyə Nazirliyi və Vəkillər Kollegiyası birgə əməkdaşlıq çərçivəsində vəkillər üçün intensiv təlimlər keçirilməkdədir.
Vəkillər Kollegiyasının üzvləri təlimlərdə “Elektron məhkəmə” informasiya sistemində şəxsi kabinet yaradılması, sənədlərin kabinet vasitəsilə ötürülməsi, dövlət rüsumunun ödənilməsi, iş materiallarının əldə olunması məsələləri ilə bağlı müfəssəl məlumatlandırılır, onlara bu proses nümunələrlə izah edilir, vəkilləri maraqlandıran suallar cavablandırılır. Bu cür təlimlərin mütəmadi olaraq ölkənin bütün regionlarında fəaliyyət göstərən vəkillər üçün təşkil olunub keçirilməsi planlaşdırılır.
Qeyd olunmalıdır ki, “Məhkəmə sistemi üzrə aparılmış islahatlarla bağlı icra və kommunikasiya planı” ilə bağlı aidiyyəti qurumların nümayəndələrindən ibarət işçi qrup yaradılıb. Vəkillər Kollegiyasını işçi qrupda Rəyasət Heyətinin aparat rəhbərinin müavini Seymur Səfərov təmsil edir.
Vəkillər “Elektron Məhkəmə” İnformasiya Sistemi ilə bağlı keçiddəki təlimatı yükləməklə, yaxud Vəkillər Kollegiyası Rəyasət Heyətinin aparatına müraciət edərək onları maraqlandıran suallara cavab tapa bilərlər.
Bölmənin digər xəbərləri
