Vergi orqanına təqdim olunan hesabat hansı hallarda qəbul edilmir?
Bakı, 19 sentyabr, AZƏRTAC
Vergi orqanına təqdim edilmiş vergi hesabatı bir sıra hallarda qəbul edilmədikdə, hesabatın vergi orqanına daxil olduğu gündən 3 iş günü ərzində vergiödəyicisinə bu barədə, habelə aşkar edilmiş dəqiqsizliklər aradan qaldırılaraq vergi orqanına təqdim edilməsi barədə bildiriş göndərilir.
AZƏRTAC Dövlət Vergi Xidmətinə istinadla xəbər verir ki, hesabatda vergi dövrünün əks olunmaması, vergiödəyicisi olan hüquqi şəxs tərəfindən kağız daşıyıcı vasitəsilə verilən vergi hesabatının imzalanmaması və möhürlə təsdiq edilməməsi, vergiödəyicisi olan hüquqi və fiziki şəxslər tərəfindən elektron sənəd formasında göndərilən vergi hesabatının müvafiq qanunvericiliyin və ya qaydaların tələblərinə uyğun gəlməməsi və digər hallar olduqda da vergi hesabatı qəbul edilmir.
Qeyd olunub ki, vergiödəyiciləri bildirişi aldıqdan sonra müvafiq düzəlişləri edərək yenidən Dövlət Vergi Xidmətinə müraciət edə bilər. Müraciətlər Azərbaycan Respublikası Prezidentinin müvafiq Fərmanı ilə təsdiq edilmiş “Dövlət orqanlarında, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərdə və büdcə təşkilatlarında kargüzarlığın aparılmasına dair Təlimat"a uyğun qəbul edildikdən sonra qeydə alınır və aidiyyəti struktur bölməyə icra edilməsi üçün göndərilir.
Bölmənin digər xəbərləri
