Vergi Xidmətinin nümayəndələri IOTA-nın Baş Əlaqələndiricilər Forumunda iştirak ediblər
Bakı, 19 aprel, AZƏRTAC
İqtisadiyyat Nazirliyi yanında Dövlət Vergi Xidmətinin (DVX) nümayəndələri Avropadaxili Vergi Administrasiyaları Təşkilatının (IOTA) Baş Əlaqələndirici Şəxslərin 28-ci Forumunda iştirak ediblər.
Dövlət Vergi Xidmətinin Media və kommunikasiya idarəsindən AZƏRTAC-a verilən məlumata əsasən, forumun birinci günündə IOTA-nın icraçı katibi vəzifələrini müvəqqəti icra edən Yevgenius Soldatkovas təşkilatın 2020-ci il üzrə fəaliyyəti barədə hesabat xarakterli məlumat verib.
Sonra təşkilatın postpandemiya dövründə fəaliyyət istiqamətləri, virtual formatda keçirilmiş tədbirlərin IOTA-ya üzv olan dövlətlərə qazandırdığı üstünlüklər və yaratdığı çətinliklər, eləcə də gələcəkdə keçirilməsi planlaşdırılan “hibrid” formatda tədbirlərin səmərəliliyi barədə müzakirələr aparılıb.
Forumun ikinci günündə üzv dövlətlər arasında texniki yardımın göstərilməsi formatları və beynəlxalq vergitutma məsələləri ətrafında fikir mübadiləsi aparılıb.
Qeyd olunub ki, Azərbaycan 2002-ci ildən IOTA-nın tam hüquqlu üzvüdür və 2003-cü ilin mayın 13-dən etibarən müvafiq qanunla qurumun Nizamnaməsinə qoşulub.
Dövlət Vergi Xidməti ardıcıl olaraq 3 dəfə (2013/2014, 2014/2015 və 2015/2016-cı illər) təşkilatın İcraiyyə Şurasına üzv seçilib. Hazırda IOTA-nın 2018-2022-ci illər üzrə strategiyası qüvvədədir və həmin strategiyanın hazırlanmasında DVX-nin əməkdaşları yaxından iştirak ediblər.
Videoformatda keçirilmiş forumda təşkilata üzv olan 44 ölkənin 56 nümayəndəsi iştirak edib. Forumda Dövlət Vergi Xidmətini IOTA-nın Azərbaycan tərəfindən baş əlaqələndirici şəxsi, Vergi Xidmətinin Beynəlxalq vergitutma və vergi monitorinqi baş idarəsinin rəisi vəzifələrini icra edən, baş idarə rəisinin müavini Orxan Musayev və idarənin əməkdaşı Səməd Bayramlı təmsil ediblər.
Bölmənin digər xəbərləri
