İQTİSADİYYAT
Vergilər Nazirliyi və ACCA qarşılıqlı əməkdaşlıq məsələlərini müzakirə edib
Bakı, 26 oktyabr, AZƏRTAC
Bakıda səfərdə olan İmtiyazlı Sertifikatlaşdırılmış Mühasiblər Assosiasiyasının (The Association of Chartered Certified Accountants - ACCA) nümayəndələri Vergilər Nazirliyinin Tədris Mərkəzində olublar.
Nazirlikdən AZƏRTAC-a bildirilib ki, görüşdə indiyədək keçirilən bu cür tədbirlərin qarşılıqlı əməkdaşlığın inkişafında böyük önəm daşıdığı, kadr potensialının artırılmasının əsas prioritet istiqamətlərdən olduğu bildirilib, mövcud kadr resurslarının inkişaf etdirilməsi istiqamətində yeni mərhələyə qədəm qoyulduğu vurğulanıb. Həmçinin qarşılıqlı əməkdaşlıq şəraitində hazırlanacaq məhsul sayəsində vergi ödəyiciləri ilə vergi orqanı əməkdaşları arasında yaranacaq ortaq dilin vacibliyi məsələsinə toxunulub.
Qeyd edilib ki, bu, vergi mübahisələrinin qısa zamanda həllinə və vahid uçot sisteminin formalaşmasına əsaslı töhfə verəcək. Hazırlanacaq məhsulun hüquqi statusu və əhatə dairəsi barədə geniş müzakirələr aparılıb.
Qarşılıqlı əməkdaşlıq münasibətlərinə həsr olunan görüşdə ACCA-nın İnkişaf etməkdə olan bazarlar üzrə direktoru Maqdalena Krupa-Hernandez, Kollektiv investisiya portfelinin rəhbəri Vera Starodubtseva, Ukrayna, Belarus və Qafqaz ölkələri üzrə rəhbəri Canetta Onisçuk, regional inkişaf meneceri Denis Şor ilə Tədris Mərkəzinin elmi-tədqiqat işləri üzrə rəis müavini Mirəli Kazımov və Vergilər Nazirliyinin İnsan Resursları Baş İdarəsi rəisinin müavini Nərgiz Muradova iştirak ediblər.