“Vətənimizə virtual səyahət” layihəsinin növbəti virtual turu: İsmayıllı rayonu
Bakı, 30 aprel, AZƏRTAC
Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası ciddi karantin rejiminə dəstək olaraq “Vətənimizə virtual səyahət” layihəsi çərçivəsində növbəti videoçarx hazırlayıb.
Kitabxanadan AZƏRTAC-a bildirilib ki, koronavirusa görə evdə qalan əhali üçün növbəti virtual səyahət qədim və müasirliyin gözəlliyini özündə əks etdirən İsmayıllı rayonunadır.
Videoçarxda ilk olaraq, İsmayıllı rayonunun ərazisi və əhalisi haqqında ümumi məlumat toplanıb və təbiətinin geniş təsviri verilib. Topçu, Buynuz, Diyallı, Talıstan, Qalıncaq, Basqal və digər qalın, böyük su saxlayıcı qabiliyyəti ilə seçilən meşələrin, uca dağların, suyu gur olan çayların, şəlalələrin, bulaqların adları qeyd olunub və izləyicilər üçün fotoları yerləşdirilib.
Videoçarxda İsmayıllının zəngin meşə örtüyündən də söz açılıb.
Videoçarxın davamında qədimliyi ilə fərqlənən Cavanşir qalası (VI-VII əsr), Fit qalası (VII əsr), Xanəgah Qız qalası (VII-VIII əsr), Girdiman qalası (XI-XII əsr), Xan qalası, məscidlər və digər tarixi abidələrin, bununla yanaşı müasir binaların, muzeylərin, ziyarətgahların fotoları da təqdim olunub. Ziyarətgahlar sırasında Talıstan kəndində yerləşən Papaq piri, Əhən kəndində yerləşən Əhən Piri, Qalıçaq kəndində yerləşən Yel və Axund Baba pirləri ilə yanaşı ziyarət edilən digər pirlərində fotoları verilib.
Xalçaçılığı ilə seçilən İsmayıllı rayonuna məxsus Şirvan, Pərvan, Qollu çiçək, Dağlı çiçəyi, Pərvədil, Zeyvə kimi xalçaların fotoları əks olunub.
İsmayıllının tarixi və müasir görkəmli şəxsiyyətlərin siyahısı videoçarxda qeyd edilib.
Videoçarxın sonunda bir-birindən fərqli ləzzətləri ilə seçilən mətbəxinə aid pip dolması, səməni halvası, Basqal halvası, həlim aşı, səbzi-plov, döşəməli plov, pəl qutabı, umac, xəmrəli, fəsəli, saciçi, lobya turşusu və başqa yeməklərin adları və fotoları verilib.
Təqdim olunan videoçarxın giriş hissəsi Pünhan İsmayılovun səsləndirdiyi “Ay İsmayıllı” şeiri ilə başlayır və Kamilə Nəbiyevanın mahnısı ilə davam edir.
“Vətənimizə virtual səyahət” adlı layihəyə daxil olan videoçarxları "Facebook"da “Kitabsevər uşaqlar” səhifəsində və "YouTube" kanalında izləmək mümkündür.
Layihə əsasında hazırlanan videoçarxlar silsilə şəkildə davam edəcəkdir.
Bölmənin digər xəbərləri
