VYANADA “AZƏRBAYCANA QARŞI MÜHARİBƏ: MƏDƏNİ İRSİN HƏDƏFƏ ALINMASI” KİTABININ TƏQDİMATI OLMUŞDUR
AZƏRTAC-ın xüsusi müxbiri xəbər verir ki, aprelin 29-da Azərbaycanın Avstriyadakı səfirliyinin təşkilatçılığı ilə Vyanada Heydər Əliyev Fondu və ölkəmizin Xarici İşlər Nazirliyi tərəfindən “Qarabağ haqqında faktlar” silsiləsindən ingilis dilində hazırlanmış “Azərbaycana qarşı müharibə: mədəni irsin hədəfə alınması” kitabının təqdimatı olmuşdur.
Mərasimdə ATƏT katibliyinin, Türkiyə, ABŞ, İtaliya, Pakistan, Səudiyyə Ərəbistanı, Nigeriya, Suriya, Sudan və Finlandiyanın Vyanadakı səfirliklərinin təmsilçiləri, Avstriya hökumət qurumlarının əməkdaşları, ölkə ictimaiyyətinin nümayəndələri, həmyerlilərimiz iştirak etmişlər.
Təqdimat mərasimini açan ölkəmizin Avstriyadakı səfiri Fuad İsmayılov təcavüzkar Ermənistan tərəfindən Azərbaycan ərazilərinin 20 faizinin işğal edildiyini, bir milyon soydaşımızın Ermənistandakı əzəli vətənlərindən və işğal altındakı digər torpaqlarımızdan qovulduğunu vurğulamış, əksəriyyəti uşaq, qadın və qocalar olmaqla minlərlə həmyerlimizin qətlə yetirildiyini, ermənilərin azərbaycanlılara qarşı sistemli etnik təmizləmə siyasəti apardığını bildirmişdir. Səfir demişdir ki, beynəlxalq hüquq normalarını rəhbər tutan Azərbaycanın münaqişənin sülh yolu ilə həllinə səy göstərməsinə baxmayaraq, Ermənistanın qeyri-konstruktiv mövqeyi üzündən bu məsələdə hələ də əsaslı irəliləyiş əldə olunmamışdır.
Səfir nəşrin hazırlanmasında böyük xidməti olan Heydər Əliyev Fondu, 2004-cü ildə əsası qoyulmuş qurumun göstərdiyi fəaliyyəti, beynəlxalq əlaqələri və ölkəmizdən kənarda həyata keçirdiyi xeyriyyəçilik layihələri barədə də məlumat vermişdir.
Sonra kitab, multimedia diski və sənədli filmdən ibarət nəşrin tədqiqatçı və tərtibçisi, Xarici İşlər Nazirliyi xarici siyasətin planlaşdırılması və strateji araşdırmalar idarəsinin birinci katibi Kəmalə İmranlı slaydlarla müşayiət olunan geniş məruzə ilə çıxış etmişdir. O, Azərbaycanın sivilizasiyanın beşiklərindən biri olduğunu vurğulamış, XIX əsrdə Rusiya-İran müharibələrindən sonra ermənilərin Türkiyə və İrandan Azərbaycana kütləvi şəkildə köçürülməsindən, onaların özlərini Cənubi Qafqazın qədim əhalisi kimi qələmə verməyə çalışmasından faktlarla söz açmışdır. Bildirmişdir ki, 1918-ci ildə Ermənistan dövləti yaradılarkən onun ərazisi 8-10 min kvadratkilometr olmuş, lakin bolşeviklərin sayəsində Azərbaycan və Gürcüstan əraziləri hesabına indiki ölçüyə çatdırılmışdır. “Dənizdən-dənizə Böyük Ermənistan” mifini gerçəkləşdirməyə çalışan erməni millətçiləri ötən əsrin 80-ci illərində yenidən Azərbaycana qarşı ərazi iddiası ilə müharibəyə başlamış, Dağlıq Qarabağ və onun ətrafındakı yeddi rayonu işğal etmişlər. İşğal altında olan ərazilərdə 1891 mədəniyyət abidəsini, o cümlədən muzeyləri, rəsm qalereyalarını, mədəniyyət evlərini və s. talamış, dağıtmış, Azərbaycan mənşəli toponimləri erməniləşdirmişlər.
Dağlıq Qarabağ ərazisindəki tarixi və mədəniyyət abidələrinin işğaldan əvvəl və sonrakı vəziyyətini əks etdirən fotoşəkillərin nümayişi iştirakçılarda erməni cinayətkarlarının Azərbaycan mədəni irsini necə məhv etdiyi haqda əyani təsəvvür yaratmışdır.
Sonra K.İmranlının ssenarisi əsasında çəkilmiş sənədli film nümayiş etdirilmişdir. Filmdə qədim Azərbaycan mədəniyyəti, hazırda işğal altında olan ərazilərdəki zəngin tarixi abidələr, zəbt edilmiş şəhər və rayonlar haqqında ətraflı məlumat verilir. Eyni zamanda, ermənilərin 1828-1911 illərdə çar Rusiyası tərəfindən əksəriyyəti Azərbaycanda yerləşdirilməklə Qafqaza köçürülməsi, onların “Böyük Ermənistan” mifini reallaşdırmaq istiqamətində əsrlərdən bəri göstərdiyi fəaliyyət, Azərbaycan mədəniyyəti və tarixinə qarşı amansız davranışı sənədlər, fotolar və faktlar əsasında geniş işıqlandırılır.
Sonda iştirakçıları maraqlandıran suallara cavab verilmiş, onlara “Azərbaycana qarşı müharibə: mədəni irsin hədəfə alınması” nəşri paylanmışdır.
Bölmənin digər xəbərləri
