İcazə verin, hər bir xaçmazlının hədsiz məhəbbətini, dərin hörmət və ehtiramını ifadə edərək, Sizi, hər bir azərbaycanlının sevimli Prezidentini Xaçmaz torpağında ən səmimi duyğularla salamlayım, bu bərəkətli və xoşbəxt diyara “Xoş gəlmisiniz”! deyim.

Möhtərəm cənab Prezident,

Sizin Xaçmaza hər bir gəlişiniz bizim üçün səmimi görüşlər, xoş xatirələrlə yanaşı, həm də böyük miqyaslı tikinti-quruculuq işləri, həyati əhəmiyyətli obyektlərin açılışı ilə yadda qalır. Respublikamıza böyük uğurla rəhbərlik etdiyiniz üç il müddətində rayonumuza sayca üçüncü gəlişinizlə Siz daha böyük bir missiyanı həyata keçirirsiniz. Respublikamızın müxtəlif bölgələrində, o cümlədən Xaçmazda elektrik stansiyasını istifadəyə verməklə Azərbaycanı nura qərq edirsiniz.

Qısa bir müddətdə və yüksək keyfiyyətlə tikilib bölgə əhalisinin istifadəsinə verilən və bu gün açılışına toplaşdığımız elektrik stansiyası şimal bölgəsi rayonlarının enerjiyə olan tələbatını tam ödəməklə yanaşı, iqtisadiyyatımızın daha sürətli inkişafına təminat yaradacaqdır. Bu xeyirxah işə görə əhalimiz Sizə hədsiz minnətdarlığını bildirir, Azərbaycanın inkişafı naminə fədakar əməyinizdə daha böyük uğurlar diləyir.

Möhtərəm cənab Prezident,

Xalqımızın ümummilli lideri, ulu öndərimiz Heydər Əlirza oğlu Əliyev daim bu bölgəyə, o cümlədən Xaçmaz rayonuna xüsusi diqqət və qayğı göstərmiş, üç dəfə - 1981, 1983 və 1998-ci illərdə Xaçmazda olmuş, rayonun iqtisadiyyatının inkişafı üçün öz tövsiyələrini vermiş, xaçmazlılar haqqında çox dəyərli sözlər demişdir. Bu gün məharətlə həyata keçirdiyiniz idarəçilik bacarığını, qətiyyəti, əzmkarlığı, səmimiyyəti və ən ümdəsi, Vətən sevgisini, xalqımıza məhəbbəti Siz o dahi şəxsiyyətdən əxz etmisiniz. Ulu öndərimizin işıqlı ideyalarını uğurla həyata keçirməklə Siz Azərbaycanı gözəl bir diyara, inkişaf etmiş məmləkətə çevirirsiniz. Bu gün doğma Azərbaycanımızın hər bir guşəsində, hər bir eldə, obada ümummilli liderimizin arzuları Sizin sayənizdə reallığa çevrilir. Azərbaycanın dünənədək ucqar, əlçatmaz hesab olunan bölgələrinə yollar, içməli su və təbii qaz, rabitə xətləri çəkilir. Müasir məktəblər, xəstəxanalar, idman kompleksləri inşa edilir. Yeni iş yerləri açılır, insanların həyat səviyyəsi, maddi rifahı günbəgün yaxşılaşır. Bütün bunlar Sizin böyük uzaqgörənliklə təsdiqlədiyiniz regionların sosial-iqtisadi inkişafı Dövlət proqramının həyata keçirilməsinin real nəticələridir.

Möhtərəm Prezidentimiz,

2005-ci il iyulun 26-da bölgəmizə səfərinizin yekunu olaraq imzaladığınız Sərəncam Sizin rəhbərliyinizlə həyata keçirilən işlərin daha geniş miqyas almasına şərait yaratmışdır. Rayonumuza son səfərinizdən ötən bir ildən bir qədər artıq müddət ərzində 14 il təbii qaz ala bilməyən Xaçmaz şəhərinin böyük bir yaşayış massivinə Sizin xüsusi göstərişinizlə qazın verilişi bərpa edilmişdir. Rayonumuzun kəndlərinə müntəzəm olaraq təbii qaz verilməsinin bərpası işləri davam etdirilir. Sizin ayırdığınız vəsait hesabına 2 kilometr uzunluğunda yeni, abad, müasir qaydada işıqlandırılmış küçə salınmışdır ki, bu da Xaçmaz şəhərində günbəgün artan nəqliyyat vasitələrinin daha rahat hərəkətinə şərait yaratmışdır. Son iki ildə rayonda 11 məktəb binası tikilmişdir. Bunlardan 4-ü “Yeniləşən Azərbaycana yeni məktəb” çərçivəsində Heydər Əliyev Fondu tərəfindən inşa edilmişdir.

Möhtərəm Prezidentimiz, Sizin göstərişinizlə Xaçmazda 6 min nömrəlik yeni elektron tipli ATS quraşdırılmışdır. Xaçmaz və Xudat şəhərlərində 3 yeni orta məktəb binalarının, Qarabağ əlilləri və şəhid ailələri üçün 24 mənzilli yaşayış evinin tikintisi, içməli su və kanalizasiya xətlərinin çəkilişi və əsaslı təmiri davam etdirilir. Təkcə son bir il ərzində rayonda küçə və yollara 110 min kvadratmetr asfalt döşənmişdir. Aqroservis və təchizat bazası yaradılmışdır. 15 adda 35 ədəd kənd təsərrüfatı texnikası, 1536 ton mineral gübrə gətirilmişdir və bunlardan kənd təsərrüfatında səmərəli istifadə olunur.

Möhtərəm cənab Prezident, Sizin rəhbərliyinizlə respublikamızda hökm sürən sağlam və işgüzar mühit insanları qurub-yaratmağa ruhlandırır. Son bir ildə rayonda mədəniyyət və istirahət parkı yaradılmış, 200-dən artıq şəhidin xatirəsini əbədiləşdirən Şəhidlər xiyabanı tikilmiş, Xaçmaz şəhərinin qədimliyinin simvoluna çevrilmiş əzəmətli Qoşa qapı, Yeni Azərbaycan Partiyası Xaçmaz rayon təşkilatı üçün ikimərtəbəli yeni inzibati bina inşa edilmiş, sərkərdə və şair Şah İsmayıl Xətainin abidəsi ucaldılmışdır. Rayon tarix-diyarşünaslıq muzeyi tam yenidən qurulmuş, ulu öndərimizin adını daşıyan küçədə Şəxsiyyətlər muzeyi yaradılmışdır. Bölgəmizin qədim el sənəti olan xalçaçılığın zəngin ənənələrini yaşadan xalça muzeyi təşkil edilmişdir. Bu işlər indi də gedir və gələcəkdə də davam etdiriləcəkdir.

Əhalimizin maddi rifahının günbəgün artmasının nəticəsidir ki, quruculuq işləri təkcə mərkəzdə deyil, rayonun bütün ərazilərində gedir. Köhnə, çiy kərpicdən tikilmiş evləri mişar daşından inşa edilən yaraşıqlı binalar əvəz edir. Möhtərəm cənab Prezident, deyilənlərə sübut olaraq bir faktı qeyd etmək istəyirəm ki, təkcə bu ilin on ayı ərzində əhali tərəfindən rayona 1050 ədəd şəxsi minik və yük avtomobili gətirilmişdir. Ümumiyyətlə, rayonda hər 22 nəfərə bir şəxsi minik maşını düşür. Son bir ildə sahibkarlar tərəfindən onlarca müasir tipli ticarət, iaşə və xidmət obyektləri, 50 yerlik müasir mehmanxana, asfalt zavodu, 8 fındıq emalı sexi tikilib istifadəyə verilmişdir. Hələ ümummilli liderimizin arzusu olan turizm sektorunun inkişafı istiqamətində də çox əhəmiyyətli işlər görülür və Sizin rəhbərliyinizlə miqyası günbəgün artır. Həyata keçirilən tədbirlərin nəticəsində rayonda 2003-cü ilin oktyabrından indiyədək 8530 iş yeri açılmışdır ki, bunların da 4000-dən çoxu daimi iş yeridir.

Möhtərəm cənab Prezident, Siz regionlarda olarkən qazanılan hər bir uğuru, inşa edilən hər bir yeni obyekti, açılan hər bir yeni iş yerini görəndə necə sevindiyinizin şahidiyik. Ötən ilin iyul ayında rayonumuzda olarkən açılışını etdiyiniz yeni tikililər bu gün rayonumuzun və bölgənin əhalisinə keyfiyyətlə xidmət edir. İcazənizlə, hər bir xaçmazlının arzusunu ifadə edərək, rayonda tikilmiş bir neçə yeni obyekti ziyarət etməyinizi, onların fəaliyyətinə rəhbər xeyir-duası verməyinizi Sizdən xahiş edirəm. Bu obyektlərin hər birinin ərsəyə gəlməsində Sizin böyük əməyiniz və hədsiz xidmətiniz vardır.

Zati-aliləri, əziz və möhtərəm Prezidentimiz, Vətənimiz Azərbaycan naminə gördüyünüz misilsiz işlərə görə Sizi sevən, Sizə inanan və güvənən xaçmazlılar adından bir daha dərin minnətdarlığımı bildirirəm. Sizə uzun ömür, möhkəm cansağlığı, səadət arzulayır, ölçüyəgəlməz işlərinizdə ən böyük uğurlar və qələbələr diləyirik. Sağ olun.