Xaçmazda Azərbaycan Kəlağayısı Günü qeyd olunub
Xaçmaz, 25 noyabr, Elxan Yusifli, AZƏRTAC
Milli qadın geyiminin qədim atributu – kəlağayı təkcə ipək başörtüyü deyil, həmçinin mədəni kimliyimizin, sənətkarlığın və Azərbaycan irsinin rəmzi kimi tanınır.
AZƏRTAC-ın bölgə müxbiri xəbər verir ki, bu barədə 26 Noyabr – Azərbaycan Kəlağayısı Günü münasibətilə Xaçmaz Tarix Diyarşünaslıq Muzeyinin Xalça muzeyi filialında keçirilən tədbirdə bildirilib.
Qeyd olunub ki, Birinci vitse-prezident, Heydər Əliyev Fondunun prezidenti Mehriban Əliyevanın Azərbaycan mədəni irsinin mühafizəsinə yönəlmiş səyləri kəlağayını yox olmaqdan qoruyub. 2014-cü ildə Azərbaycan kəlağayı sənəti "Kəlağayı simvolizmi və ənənəvi sənəti" adı ilə UNESCO-nun Qeyri-Maddi Mədəni İrs üzrə Reprezentativ Siyahısına daxil edilib.
Bildirilib ki, maddi və mənəvi sərvətlərimizin əvəzolunmaz hissəsi olan kəlağayı milli örpək kimi bu gün də istifadə olunur. 2003-cü ildən İsmayıllı rayonunun Basqal qəsəbəsində "Kəlağayı" İpək Mərkəzi fəaliyyət göstərir. Həmçinin Basqalda unikal interaktiv "Kəlağayı" muzeyi yaradılıb.
Tədbirdə qadınlarımızın ismət, ləyaqət, barışıq rəmzi olan sevimli baş örpəyi, milli ipəyimizin ən gözəl nümunəsi olan Azərbaycan kəlağayısı, onun naxışlarının xarakterizə etdiyi simvollar haqqında ətraflı məlumat verilib, məktəblilər mahnı və rəqslər ifa edib, şeirlər səsləndiriblər.
Bölmənin digər xəbərləri
