MƏDƏNİYYƏT
XALQ ARTİSTİ SARA QƏDİMOVANIN YARADICILIĞINA HƏSR OLUNMUŞDUR
Noyabrin 15-də Azərbaycan Dövlət Mədəniyyət və İncəsənət Universitetinin “Səda” tədris teatrında xalq artisti Sara Qədimovanın yaradıcılığına həsr olunmuş “Sara tək xoş avaz təkcə Azərbaycana gəlib” adlı musiqili-ədəbi məclis keçirilmişdir.
Foyedə sənətkarın həyat və fəaliyyətini əks etdirən fotosərgi təşkil olunmuşdu.
Tədbiri universitetin dosenti Könül Axundova açaraq, görkəmli müğənninin zəngin sənət yolundan danışdı.
Bəstəkarlar İttifaqının birinci katibi, xalq artisti professor Vasif Adıgözəlov, Mədəniyyət və İncəsənət Universitetinin prorektoru, professor Rafiq Sadıqov, xalq artisti Canəli Əkbərov və başqaları çıxış edərək, Azərbaycan milli ifaçılıq sənətinin inkişafında Sara Qədimovanın müstəsna xidmətlərindən söhbət açdılar, onun bənzərsiz yaradıcılığının gənc müğənnilər üçün örnək olduğunu vurğuladılar. Eyni zamanda müğənniyə sonsuz sevgi və ehtiramlarını ifadə etdilər.
Məclisdə ayrı-ayrı sənətçilərin ifasında Sara xanımın repertuarından mahnılar səsləndi.
Xalq artisti Sara Qədimova çıxış edərək, ömrünün 62 ilini ifaçılıq xalqına xidmətə həsr etdiyini söylədi, sənət adamlarına daim qayğı və diqqət göstərdiyinə görə Prezident Heydər Əliyevə minnətdarlığını bildirdi.