Xidmət rəisi: Süni intellekt alətlərinin fəaliyyətimizdə geniş tətbiqi təbii prosesə çevriləcək
Bakı, 29 iyul, AZƏRTAC
Süni intellektin tətbiqi hazırda həm dövlət qurumlarını, həm də özəl sektoru düşündürən əsas məsələlərdən biridir. Çünki bu texnologiya fəaliyyətin optimallaşdırılması, səmərəliliyin artırılması və iş proseslərinin sürətləndirilməsi baxımından böyük imkanlar yaradır. Bununla yanaşı, dövlət qurumlarında süni intellektin tətbiqi ilə bağlı düzgün təhlillər aparılmalı və hansı sahələrdə istifadəsinin məqsədəuyğun olduğu müəyyən edilməlidir. Çünki biz geniş fərdi məlumat bazası ilə işləyirik və bu məlumatların təhlükəsizliyi, emalı və qorunması xüsusi əhəmiyyət daşıyır.
Bu fikirləri AZƏRTAC-ın əməkdaşının sualına cavab olaraq Dövlət Miqrasiya Xidmətinin rəisi Vüsal Hüseynov iyulun 29-da keçirilən brifinqdə səsləndirib.
"Hesab edirəm ki, süni intellektin Dövlət Miqrasiya Xidmətində qısa müddətdə tətbiq oluna biləcəyi əsas sahələrdən biri onlayn bələdçi və çağrı xidmətləridir. Məsələn, vətəndaş və ya əcnəbi elektron resurs üzərindən miqrasiya ilə bağlı sorğu göndərdikdə, həmin sorğuya əməkdaş deyil, süni intellekt vasitəsilə operativ və aydın şəkildə cavab təqdim oluna bilər.
Daha geniş perspektivdə isə süni intellektin miqrasiya məlumatlarının emalı, böyük həcmli məlumatların təhlili, miqrasiya proseslərinin proqnozlaşdırılması, risklərin qiymətləndirilməsi və planlaşdırma istiqamətlərində tətbiqini nəzərdən keçiririk. Bizim ixtiyarımızda böyük həcmdə məlumat bazası var və süni intellekt bu məlumatların təhlili nəticəsində mövcud tendensiyaları müəyyən etməyə, gələcək riskləri əvvəlcədən qiymətləndirməyə və qərarların qəbuluna dəstək verməyə kömək edə bilər.
Bu gün üçün əsas prioritet hesab etdiyimiz istiqamətlər məhz bunlardır. Eyni zamanda, süni intellektin tətbiqi ilə bağlı dövlət siyasətinin formalaşdırılmasında iştirak edən və bu sahəyə cavabdeh olan digər qurumlarla da sıx əməkdaşlıq edirik.
Nəzərə almaq lazımdır ki, bu texnologiyanın tətbiqi ciddi resurslar tələb edir. Buraya müvafiq texniki infrastrukturun yaradılması, avadanlıqların təmin edilməsi, bu sahədə çalışan mütəxəssislərin hazırlığı, eləcə də süni intellektin hansı istiqamətlərdə təhlükəsiz və məqsədəuyğun şəkildə tətbiq ediləcəyinin müəyyənləşdirilməsi daxildir.
Bununla belə, hesab edirəm ki, süni intellektin tətbiqi həm əcnəbilər, həm də xidmətlərimizdən istifadə edən bütün şəxslər üçün əhəmiyyətli rahatlıq yaradacaq. Artıq bu gün insanlar süni intellekt alətlərindən istifadə etməklə bir çox suallarına qısa müddətdə cavab tapa bilirlər. Mən özüm də fəaliyyət sahəmizlə bağlı müxtəlif suallar verir və görürəm ki, təqdim olunan məlumatlar kifayət qədər əsaslıdır, etibarlı mənbələrə istinad edir.
İnanıram ki, bu gün 27 elektron xidmətimizin uğurla fəaliyyət göstərməsindən və istifadəçi sayının davamlı artmasından məmnunluqla danışdığımız kimi, yaxın gələcəkdə süni intellekt alətlərinin də fəaliyyətimizdə geniş tətbiqi eyni dərəcədə təbii və uğurlu bir prosesə çevriləcək", - deyə V. Hüseynov qeyd edib.
Bölmənin digər xəbərləri
