Benilüks Azərbaycan Təşkilatları Əlaqələndirmə Şurasının (BATƏŞ) fəxri sədri, Azərbaycanın Belçika və Lüksemburqdakı səfirliyinin birinci katibi Fuad Hümbətov AZƏRTAC-ın xüsusi müxbirinə bildirmişdir ki, Xocalı soyqırımına beynəlxalq ictimaiyyət, o cümlədən Belçika və Lüksemburq parlamentləri, siyasi dairələri tərəfindən müvafiq siyasi-hüquqi qiymətin verilməsinə nail olmaq məqsədilə BATƏŞ Ermənistanın Belçikadakı səfirliyinin qarşısında izdihamlı etiraz aksiyası keçirmişdir.

Tədbirdə Benilüks Azərbaycan Təşkilatları Əlaqələndirmə Şurasının üzvü olan qurumlardan Belçika Azərbaycanlılarının İnteqrasiya Mərkəzi, Belçika-Azərbaycan Evi, Niderland-Azərbaycan diasporu, Dünya Azəri-Türk Qadınlar Birliyi ilə yanaşı, Belçika-Türk Federasiyası, Brüssel Atatürk Düşüncə Dərnəyi, Köln Universitetlər Birliyi, Düsseldof Universiteti Türk Alimləri Birliyi, Almaniya Koordinasyon Kurulları, Köln Azərbaycan Mədəniyyət Dərnəyi, Köln Azərbaycan Mədəniyyət və Həmrəylik Təşkilatı və digər qurumların nümayəndələri iştirak etmişlər.

Aksiyada ingilis, fransız və flamand dillərində Ermənistanın Azərbaycan torpaqlarının işğalını pisləyən, soyqırımı törətmiş erməni siyasətçiləri və hərbçilərinin məsuliyyətə cəlb edilməsini tələb edən çoxsaylı transparantlar nümayiş etdirilmiş, əhali arasında ermənilərin dinc azərbaycanlılara qarşı törətdikləri vəhşiliklərdən bəhs edən vərəqələr paylanmış, ayrı-ayrı çıxışlarda təcavüzkar siyasət yürüdən Ermənistanın əsas məqsədləri barədə fikirlər səslənmişdir.

Benilüks Azərbaycan Təşkilatları Əlaqələndirmə Şurası adından Ermənistan səfirliyinə və Avropa İttifaqı yanındakı nümayəndəliyinə rəsmi bəyanat təqdim edilmişdir. Fransız və ingilis dillərində tərtib olunmuş sənəddə Xocalıda törədilmiş soyqırımın əsas icraçıları - Ermənistanın yeni prezidenti seçilmiş Serj Sarkisyanın, baş qərargah rəisi, general Seyran Ohanyanın və başqalarının cinayət məsuliyyətinə cəlb edilməsi beynəlxalq ictimaiyyətdən, BMT və Avropa İttifaqından tələb edilmişdir.

Daha sonra Brüsselin mərkəzi küçələri ilə hərəkət edən aksiya iştirakçıları Avropa İttifaqı təsisatlarının yerləşdiyi meydana gəlmişlər. Soyqırımla bağlı müxtəlif dillərdə tərtib edilmiş xüsusi bəyanat Avropa Komissiyasına təqdim olunmuşdur.

Tədbir barədə materiallar ölkə mətbuatında, türk və fransız dillərində nəşr edilən “Beltürk” və “Yenihaber” qəzetlərinin internet saytlarında yerləşdirilmiş, Avropa ölkələrində yayımlanan “Ulusal”, “Avropa” və “Doğan” televiziya kanallarında verilişlər göstərilmişdir.

Xocalı soyqırımı ilə bağlı səfirliyin üç dildə hazırladığı məlumatlar Avropa Parlamentinə, Belçika və Hollandiya parlamentlərinin nüfuzlu üzvlərinə, ölkələrin aparıcı media orqanlarına və müxtəlif ictimai təşkilatlara göndərilmişdir.

Etiraz aksiyasından sonra Belçikadakı səfirliyimizdə Xocalı soyqırımının 16-cı ildönümü ilə əlaqədar keçirilmiş tədbirdə səfir Emin Eyyubov XX əsrin sonunda erməni qəsbkarlarının həyata keçirdiyi soyqırımın başvermə şəraiti və əsas məqsədi, habelə bu hadisəyə hüquqi-siyasi qiymətin verilməsi üçün görüləsi işlərdən danışmışdır.

Səfirliyin birinci katibi Fuad Hümbətov diasporun gələcək fəaliyyətinə dair suallara cavab vermişdir.

Tədbir iştirakçıları Xocalı soyqırımı ilə bağlı Heydər Əliyev Fondu tərəfindən təqdim olunmuş kitablar, broşürlər və fotolar əsasında nümayiş etdirilən sərgi ilə tanış olmuşlar.