QAN YADDAŞI
Xocalı soyqırımı – ermənilərin törətdikləri qanlı cinayət
Bakı, 25 fevral, AZƏRTAC
Azərbaycan Milli Elmlər Akademiyasının Hüseyn Cavidin Ev Muzeyində Xocalı faciəsinin 25-ci ildönümünə həsr olunmuş “Xocalı soyqırımı - qan yaddaşımızda” adlı tədbir keçirilib.
Əvvəlcə faciə qurbanlarının xatirəsi anılıb.
Muzeydən AZƏRTAC-a bildiriblər ki, tədbirdə bu müəssisənin direktoru, filologiya elmləri doktoru Gülbəniz Babaxanlı ermənilərin torpaqlarımızda törətdikləri qanlı cinayətlərdən danışıb.
Diqqətə çatdırılıb ki, 1992-ci il fevralın 25-dən 26-na keçən gecə düşmən Xocalıda 613 nəfəri, o cümlədən 106 qadını, 63 uşağı, 70 qocanı xüsusi qəddarlıqla qanına qəltan edib.
Xocalı qırğınının XX əsrin ən böyük faciəsi olduğunu deyən G. Babaxanlı bu hadisənin heç vaxt unudulmayacağını vurğulayıb.
Digər çıxış edənlər də Xocalı soyqırımı barədə həqiqətlərin dünya ictimaiyyətinə daha ətraflı çatdırılmasının əhəmiyyətindən bəhs ediblər.