Xocalı soyqırımı Azərbaycan xalqının yaddaşından heç vaxt silinməyəcəkdir
Bakı, 26 fevral (AZƏRTAC). Fevralın 26-da Qiymətli Kağızlar üzrə Dövlət Komitəsində (QKDK), Milli Depozit Mərkəzinin və Bakı Fond Birjasının əməkdaşlarının iştirakı ilə Xocalı faciəsinin iyirmi ikinci ildönümünə həsr olunmuş anım mərasimi keçirilmişdir.
Komitənin ictimaiyyətlə əlaqələr sektorundan AZƏRTAC-a bildirmişlər ki, Xocalı soyqırımı qurbanlarının xatirəsi bir dəqiqəlik sükutla yad edilmişdir.
Tədbirdə çıxış edən QKDK Aparatının rəhbəri Bəxtiyar Əzizov ermənilərin Xocalıda törətdikləri soyqırımının təkcə azərbaycanlılara deyil, bütün insanlığa və bəşəriyyətə qarşı yönəldilmiş ən ağır cinayətlərdən biri kimi qiymətləndirildiyini bildirmişdir. B.Əzizov kütləvi terror hadisələrini törədən cinayətkarların layiqli cəzalarına çatacaqlarına inandığını qeyd edərək, Xocalı soyqırımının Azərbaycan xalqının yaddaşından heç vaxt silinməyəcəyini vurğulamışdır.
Sonra Xocalıda ermənilər tərəfindən həyata keçirilən etnik təmizləmə siyasətindən və törədilmiş terror aktlarından bəhs edən ”Xocalı harayı” sənədli filmi nümayiş olunmuşdur.
Bölmənin digər xəbərləri
