Xocalı soyqırımı xalqımızın qan yaddaşına əbədi həkk olunmuş faciədir
Şamaxı, 26 fevral (AZƏRTAC). Xocalı faciəsinin 22-ci ildönümü ilə əlaqədar fevralın 26-da Şamaxıda anım mərasimi keçirilmişdir. Mədəniyyət sarayında təşkil olunan mərasimin iştirakçıları əvvəlcə incəsənət təhsil mərkəzinin rəsm sərgisinə baxmışlar. Sərgidə mərkəzin şagirdlərinin Xocalı dəhşətlərini əks etdirən 35 əl işi nümayiş etdirilmişdir. Daha sonra Xocalı hadisələri ilə bağlı sənədli film göstərilmişdir.
Rayon icra hakimiyyətinin başçısı mərasimdə Xocalı hadisələri, bu qanlı cinayətin günahkarları barədə danışmışdır. Qeyd olunmuşdur ki, Xocalı soyqırımına ilk hüquqi-siyasi qiymət ulu öndər Heydər Əliyevin təşəbbüsü ilə verilmişdir. Hazırda Prezident İlham Əliyev Xocalı faciəsi barədə həqiqətlərin dünyaya çatdırılmasında, bu faciənin soyqırımı kimi tanıdılmasında qətiyyətli səylər göstərir. Məhz bunun nəticəsidir ki, artıq dünyanın 10 ölkəsi Xocalı soyqırımını tanımışdır.
Mərasimdə çıxış edənlər Xocalı soyqırımının xalqımızın qan yaddaşına əbədi həkk olunduğunu, heç vaxt unudulmayacağını vurğulamışlar.
Daha sonra rayon rəhbərləri, əmək kollektivlərinin və ictimaiyyətin nümayəndələri soyqırımı qurbanlarının xatirəsinə ucaldılmış abidə kompleksinə gələrək, Vətən şəhidlərinin xatirəsini yad etmişlər.
Bölmənin digər xəbərləri
