Xocalı soyqırımı XX əsrin ən qanlı faciələrindən biridir
Bakı, 26 fevral (AZƏRTAC). Fevralın 26-da “Excelsior Hotel Baku” otelində Xocalı soyqırımının 22-ci ildönümü ilə bağlı anım mərasimi keçirilmişdir.
AZƏRTAC xəbər verir ki, mərasimdə soyqırım qurbanlarının və Azərbaycanın ərazi bütövlüyü uğrunda canından keçmiş şəhidlərimizin xatirəsi bir dəqiqəlik sükutla yad olunmuşdur.
Tədbirdə çıxış edən yazıçı Cəlaləddin Qasımov Xocalı faciəsinin dəhşətlərindən danışmışdır. Bildirilmişdir ki, Xocalı soyqırımı XX əsrin ən qanlı faciələrindən biridir. Erməni təcavüzkarlarının törətdiyi bu kütləvi qırğın nəticəsində 613 nəfər, o cümlədən 106 qadın, 63 uşaq, 70 qoca amansızlıqla qətlə yetirilmiş, 487 nəfər şikəst olmuş, 1275 dinc sakin əsir götürülmüş, 155 nəfərin taleyi isə hələ də məlum deyildir. Xocalıda 8 ailə tamamilə məhv edilmiş, 25 uşaq hər iki valideynini itirmişdir.
Sonra yazıçının “27 ildən sonra” kitabı tədbirdə iştirak edən SOS Uşaq Kəndlərinin yeniyetmələrinə paylanmışdır.
Tədbirdə Xocalı faciəsindən bəhs edən videoçarx nümayiş olunmuşdur.
Bölmənin digər xəbərləri
