Belqrad, 26 fevral (AZƏRTAC). Azərbaycan Respublikası Prezidenti Administrasiyası rəhbərinin sərəncamı ilə təsdiq edilən “Xocalı soyqırımının iyirmi ikinci ildönümünün keçirilməsinə dair tədbirlər planı”na uyğun olaraq, fevralın 26-da Azərbaycanın Serbiyadakı səfirliyi, eləcə də Bosniya və Herseqovinada və Monteneqrodakı diplomatik nümayəndəlikləri tərəfindən Xocalı faciəsinin 22-ci ildönümü ilə bağlı anma mərasimləri keçirilmişdir.

Səfirlikdə keçirilən tədbirdə Belqradda fəaliyyət göstərən Azərbaycan Mədəniyyət Mərkəzinin, Serbiya-Azərbaycan Ticarət Palatasının təmsilçiləri, ölkə ictimaiyyəti, burada təhsil alan azərbaycanlılar, jurnalistlər və müsəlman icmasının nümayəndələri iştirak etmişlər.

Səfir Eldar Həsənov erməni millətçilərinin dövlətimizə və xalqımıza qarşı irəli sürdükləri ərazi iddiaları, törətdikləri cinayətlərindən danışmışdır. Vurğulanmışdır ki, 1918-ci ildə Bakıda, Salyanda, Lənkəranda, Xaçmazda, Qubada, Şamaxıda və digər bölgələrimizdə ermənilər tərəfindən kütləvi qırğınlar törədilmiş, 1988-ci ildə Ermənistanda yaşayan soydaşlarımız zorla ata-baba yurdlarından didərgin salınmışdır. Ermənistan-Azərbaycan, Dağlıq Qarabağ münaqişəsi, Xocalı soyqırımı barədə ətraflı məlumat verən Eldar Həsənov qeyd etmişdir ki, xalqımıza qarşı həyata keçirilən etnik təmizləmə siyasəti artıq Ermənistanın dövlət siyasətinə çevrilmişdir. Xocalı faciəsi Azərbaycan tarixində ən qanlı hadisələrdən biridir. Erməni silahlı dəstələri tərəfindən dinc əhali xüsusi qəddarlıqla qətlə yetirilmiş və əsir götürülən insanlar isə dəhşətli işgəncələrə, zülm və təhqirlərə məruz qalmışlar.

Tədbirdə, həmçinin 2013-cü il fevralın 25-də Serbiya parlamentinin gündəliyinə daxil edilmiş “Beynəlxalq hüquqa riayət olunması və Ermənistan-Azərbaycan, Dağlıq Qarabağ münaqişəsinin sülh yolu ilə həllinə dair Qətnamə” layihəsi barədə məlumat verilmiş, onun mətninin Serbiya parlamentinin saytında yerləşdirildiyi bildirilmişdir. Diqqətə çatdırılmışdır ki, bu təşəbbüs Azərbaycan və Serbiya arasında mövcud olan dostluq və strateji tərəfdaşlıq münasibətlərinin bariz nümunəsidir.

Sonra Heydər Əliyev Fondu tərəfindən hazırlanmış “Xocalı soyqırımı” sənədli filmi nümayiş etdirilmişdir.

Faciəni əks etdirən fotostend ilə tanış olan tədbir iştirakçıları Azərbaycan Respublikasının İnsan Hüquqları üzrə Müvəkkilinin (Ombudsmanın) BMT-nin Baş Katibinə, Təhlükəsizlik Şurasına, təşkilatın İnsan Hüquqları üzrə Ali Komissarına, Avropa Komissiyasına, Avropa Şurasına, ATƏT-ə, Beynəlxalq və Avropa Ombudsmanlar İnstitutlarına, Asiya Ombudsmanlar Assosiasiyasına, Beynəlxalq Sülh Bürosuna, Universal Sülh Federasiyasına, müxtəlif ölkələrin ombudsmanlarına, Azərbaycan Respublikasının xarici ölkələrdəki və xarici ölkələrin Azərbaycandakı səfirliklərinə, diaspor təşkilatlarımıza ünvanlanan Xocalı soyqırımının 22-ci ildönümü ilə əlaqədar bəyanatın mətni ilə tanış edilmişlər.

Xocalı faciəsinin 22-ci ildönümü ilə bağlı səfirlik tərəfindən hazırlanmış press-reliz, müvafiq bəyanatın mətni, habelə Xocalı sakinlərinin beynəlxalq təşkilatlara, o cümlədən Haaqa məhkəməsinə müraciətləri barədə məlumat Serbiyanın, Bosniya və Herseqovinanın və Monteneqronun dövlət və hökumət orqanlarına, parlamentlərinə, QHT-lərinə, bu ölkələrdə fəaliyyət göstərən səfirlik və beynəlxalq təşkilatların nümayəndəliklərinə göndərilmişdir.

Serbiyanın “Region World Wide” jurnalında Eldar Həsənovun müsahibəsi dərc edilmişdir. Diplomat müsahibəsində Azərbaycan-Serbiya münasibətləri, ölkəmizin sürətli inkişafı, xalqımızın məruz qaldığı, bəşəriyyət əleyhinə törədilmiş ən dəhşətli cinayətlərdən biri olan Xocalı soyqırımı haqqında danışmışdır.

Bununla yanaşı, Serbiyanın “RTS” dövlət televiziya kanalında Xocalı soyqırımına həsr olunmuş veriliş efirə getmiş, səfirlik tərəfindən www.khojaly.rs və www.xocali.rs internet ünvanları alınaraq, bu saytlarda ingilis və serb dillərində Xocalı qətliamı ilə bağlı materiallar yerləşdirilmişdir.

Fevralın 26-da Azərbaycanın Bosniya və Herseqovinadakı diplomatik nümayəndəliyi tərəfindən Xocalı soyqırımının 22-ci ildönümü ilə əlaqədar keçirilmiş anma mərasimində Bosniya və Herseqovina-Azərbaycan Dostluq Cəmiyyətinin üzvləri və bu ölkədə yaşayan azərbaycanlılar iştirak etmişlər.

Tədbir iştirakçıları əvvəlcə Azərbaycan hökuməti və Heydər Əliyev Fondunun dəstəyi ilə 2012-ci il fevralın 24-də açılmış Sarayevo şəhərində, Dobrinya çayı sahilində yerləşən Azərbaycan- Bosniya və Herseqovina dostluq parkında Xocalı və Srebrenitsa soyqırımlarını əks etdirən memorial kompleksi ziyarət etmiş, buradakı abidənin önünə tər çiçəklər düzmüşlər.

Diplomatik nümayəndəliyimizdə davam edən tədbirdə Xocalı soyqırımı qurbanlarının ruhu bir dəqiqəlik sükutla yad edilmişdir.

Sonra Azərbaycan Respublikası İnsan Hüquqları üzrə Müvəkkilinin (Ombudsmanın) Xocalı faciəsinin 22-ci ildönümü ilə əlaqədar bəyanatı oxunmuşdur.

Çıxış edənlər bütövlükdə Azərbaycan xalqına qarşı yönəldilmiş Xocalı soyqırımının ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktı olduğunu və bu soyqırımını bütün bəşəriyyətə qarşı tarixi bir cinayət kimi dəyərləndirmişlər. Tədbirdə Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası çərçivəsində Azərbaycan-Bosniya və Herseqovina dostluq parkında Xocalı və Srebrenitsa soyqırımlarını özündə əks etdirən memorial kompleksin yaradılmasının, adıçəkilən kompleksdə “Xocalı soyqırımının qurbanlarının xatirəsinə (Azərbaycan, 25-26 fevral 1992-ci il)” sözlərinin həkk edilməsinin ölkəmiz üçün əlamətdar hadisə olduğu bildirilmişdir. Vurğulanmışdır ki, Bosniya və Herseqovina Xocalı soyqırımı qurbanlarının xatirəsini özündə əks etdirən bütöv memorial kompleksin yaradıldığı ilk ölkədir.

Azərbaycan Respublikasının Prezidenti İlham Əliyevin həyata keçirdiyi uğurlu xarici siyasətin əməli nəticəsi olaraq, Bosniya və Herseqovinanın Parlament Məclisinin Xalqlar Palatasının 2013-cü il fevralın 26-da keçirilən iclasında mütləq səs çoxluğu ilə Ermənistanın Azərbaycana təcavüzü və Xocalı soyqırımı ilə bağlı rəsmi sənədin - “Azərbaycan Respublikasının suverenliyinin və ərazi bütövlüyünün tanınması və hörmət olunması”na dair qətnamənin qəbul olunması bu qanlı faciəyə verilən hüquqi-siyasi qiymətin bariz göstəricisi kimi dəyərləndirilmişdir. Diplomatik nümayəndəlik tərəfindən www.khojaly.ba və www.xocali.ba internet səhifələri açılmışdır.

Azərbaycanın Monteneqrodakı diplomatik nümayəndəliyi tərəfindən fevralın 26-da Xocalı faciəsinin 22-ci ildönümü ilə əlaqədar keçirilən tədbirdə Podqoritsada akkreditə olunmuş diplomatik korpusun, “Türk Hava Yolları”nın, “Yunus Əmrə Vakfı”nın, bu ölkədə yaşan Azərbaycan və Türk icmalarının nümayəndələri iştirak etmişlər.

Bununla yanaşı, Monteneqronun geniş izləyici kütləsinə malik “Prvatv” telekanalında Xocalı soyqırımı haqqında müsahibə və videomaterial nümayiş olunmuş, “Xocalıya ədalət!” beynəlxalq məlumat və təşviqat kampaniyası üzrə yerli əlaqələndirici müəyyən edilmişdir. Həmçinin Azərbaycan-Monteneqro Mədəni və İqtisadi Əlaqələr Mərkəzinin icraçı direktoru Hanna İzotavanın “Pobejda” qəzetində Xocalı faciəsi ilə bağlı məqaləsi dərc edilmiş, khojaly.me və xocali.me internet səhifələri açılmışdır.

Maqsud Dadaşov

AZƏRTAC-ın xüsusi müxbiri

Belqrad