Yanvar-mart aylarında 28 min nəfərin su təchizatı fasiləsiz rejimə keçirilib
Bakı, 26 aprel, AZƏRTAC
Yanvar-mart aylarında 28 min nəfərin su təchizatı fasiləsiz rejimə keçirilib.
“Azərsu” ASC-nin mətbuat xidmətindən AZƏRTAC-a bildirilib ki, bu barədə 2018-ci ilin yanvar-mart ayları üzrə fəaliyyətinin yekunlarına və qarşıda duran vəzifələrə həsr olunmuş iclasında deyilib.
“Azərsu” ASC-nin sədri Qorxmaz Hüseynov bildirib ki, Prezident İlham Əliyev tərəfindən həyata keçirilən sosial-iqtisadi siyasət nəticəsində 2018-ci ilin birinci rübündə ölkə iqtisadiyyatı dinamik inkişaf edib, bütün sahələrdə müsbət irəliləyiş təmin olunub. Aprelin 11-də keçirilmiş prezident seçkilərinin mühüm hadisə olduğunu xatırladan sədr “Azərsu” ASC-nin kollektivi adından ölkə başçısını növbəti müddətə Azərbaycan Respublikasının Prezidenti seçilməsi münasibətilə təbrik edib.
Q.Hüseynov bu ilin birinci rübündə istehlakçılara göstərilən içməli su təchizatı və kanalizasiya xidmətlərinin yaxşılaşdırılması istiqamətində mühüm layihələrin həyata keçirildiyini vurğulayıb: “Cari ilin fevral ayında Mingəçevir şəhərinin su təchizatı sistemlərinin yenidən qurulması işləri başa çatıb və Prezident İlham Əliyevin iştirakı ilə açılış mərasimi keçirilib. Ümumilikdə su təchizatı və kanalizasiya sistemlərinin yenidən qurulmasına başlanmış 50 şəhər və rayon mərkəzinin 23-də su və kanalizasiya şəbəkələrinin, 10-da isə su şəbəkələrinin inşası yekunlaşıb. “Əhalinin içməli su ilə təminatının yaxşılaşdırılmasına dair əlavə tədbirlər haqqında” Azərbaycan Respublikası Prezidentinin Sərəncamına uyğun olaraq ölkənin 28 rayonunun 170 yaşayış məntəqəsində layihələrin icrası tam yekunlaşıb. Bu layihələrin icrası nəticəsində həmin kəndlərdə 271 min nəfər içməli su ilə təmin olunub. Ölkə başçısının bununla bağlı imzaladığı növbəti Sərəncam çərçivəsində bu il 13 rayonun 30 yaşayış məntəqəsində su layihələri icra olunacaq”.
Qeyd olunub ki, 2018-ci ilin yanvar-mart aylarında 224 kilometr içməli su, 48 kilometr kanalizasiya xətləri çəkilib. Görülmüş işlər nəticəsində 8 min nəfər ilk dəfə mərkəzləşdirilmiş qaydada içməli su ilə təmin edilib, 28 min nəfərin su təchizatı fasiləsiz rejimə keçirilib. Beləliklə fasiləsiz rejimdə su təchizatı səviyyəsi ölkə üzrə 67,5 faiz, Bakı şəhəri üzrə isə 81,5 faiz təşkil edib.
Daha sonra “Azərsu” ASC-nin Satınalmaların təşkili və idarə olunması departamentinin rəisi Qabil Kərimov, İnformasiya və kommunikasiya texnologiyaları departamentinin rəisi Emil Əhmədov, “Bakı Sukanal” İdarəsinin rəisi Habil Quliyev, Ceyranbatan Su Təchizatı İdarəsinin rəisi Əhliman Mansurov, Sumqayıt Sukanal İdarəsinin rəisi Darvin Hüseynov, Xəzər rayon Sukanal İdarəsinin rəisi Mübariz Nəsirov hesabat məruzəsi ilə çıxış edərək müvafiq sahələr üzrə 2018-ci ilin yanvar-mart ayları ərzində görülmüş işlər və həyata keçirilmiş tədbirlər barədə ətraflı məlumat veriblər.
“Azərsu” ASC-nin sədri Qorxmaz Hüseynov iclasa yekun vuraraq görüləcək işlər və qarşıda duran vəzifələr barədə tapşırıqlarını verib. Qeyd olunub ki, bu il 7 şəhərdə su və kanalizasiya, 1 şəhərdə isə su şəbəkələrinin tikintisi yekunlaşacaq. 2018-ci ildə Qazax şəhərində içməli su və kanalizasiya sistemlərinin yenidən qurulması layihəsinin icrasına başlanacaq, 42 kənddə su layihələri icra ediləcək. Cari ildə Şamaxı, Gədəbəy, Lerik, Tovuz və Ağstafa şəhərləri üçün alternativ mənbələrin yaradılması layihələri həyata keçiriləcək. Daşkəsən, Göyçay, Qəbələ şəhərlərində, həmçinin Bakının Pirşağı qəsəbəsində tullantı sutəmizləyici qurğuların tikintisi yekunlaşacaq, 10-dan çox şəhərdə isə belə qurğuların tikintisinə başlanılacaq.
Səhmdar cəmiyyətin sədri yeni texnologiyaların tətbiqinin genişləndirilməsi, iqtisadi səmərəliliyin artırılması, abunəçilərə göstərilən müştəri xidmətlərinin keyfiyyətinin yüksəldilməsi, sayğaclaşma işlərinin sürətləndirilməsi və digər məsələlərlə bağlı tapşırıqlarını çatdırıb. “Azərsu” ASC-nin sədri Bakı şəhərində keçiriləcək Formula 1 yarışları ilə əlaqədar idman yarışlarının keçiriləcəyi yerlərdə, turizm və iaşə obyektlərində içməli su və kanalizasiya sistemlərinin normal fəaliyyətinin təmin olunması barədə müvafiq göstərişlər verib.
Bölmənin digər xəbərləri
