Yaponiya ilə ABŞ arasında ticari danışıqlar davam etdiriləcək
Tokio, 3 aprel, AZƏRTAC
Yaponiya və ABŞ bu ayın ortalarında ikitərəfli ticari müqavilə üzrə danışıqları davam etdirməyə hazırlaşırlar.
AZƏRTAC NHK telekanalına istinadla xəbər verir ki, Yaponiyanın ticarətin bərpası naziri Toşimitsu Moçeqi və ABŞ adminstrasiyasının ticari məsələlər üzrə nümayəndəsi Robert Laythayzer aprelin 15-16-da Vaşinqtonda bir araya gələcəklər.
Xatırladaq ki, ötən ilin sentyabrında iki ölkənin hökumətləri yeni ticari razılaşma haqda danışıqların aparılması barədə razılığa gəliblər. Danışıqların cari ilin yanvarında başlanması nəzərdə tutulsa da, ABŞ-ın Çin ilə ticari razılaşmanın imzalanmasına daha çox diqqət ayırması onu təxirə salıb.
Yaponiya tərəfinin bildirdiyinə görə, T.Moçeqi və R.Laythayzer Yaponiya ilə ABŞ liderlərinin son sammitindən sonra dərc edilən birgə bəyannaməyə uyğun əmtəələrin ticarəti barədə razılaşmanı müzakirə edəcəklər.
Eyni zamanda, danışıqların birinci raundunda ciddi irəliləyiş əldə ediləcəyi təqdirdə, digər sahələrin, məsələn, xidmətlərin də müzakirə olunacağı gözlənilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
