YAPONİYADA DÜNYADA ƏN İRİ QIZIL SİKKƏLƏRİN SATIŞINA BAŞLANACAQ

07.10.2004 [14:44]
Çap et
A⁺ A^-

AZƏRTAC xarici informasiya agentliklərinə istinadla xəbər verir ki, Yaponiyada Avstriya zərbxanasında kəsilmiş diametri 37 santimetr, çəkisi 31 kiloqram olan və dünyada ən iri qızıl sikkələrin satışına başlanacaqdır. 100 min avro nominalında sikkələr qızılın hazırkı bazar qiymətinə uyğun olaraq 60 milyon yenə, yəni 445 min avroya satılacaqdır.

Cəmi 15 ədəd belə sikkə kəsilmişdir. Onların bir hissəsi ABŞ-da və Avropada satılacaqdır. Sikkəkəsmə ustası və zərbxananın prezidenti Ditmar Şprants demişdir ki, “bu pullar qanuni valyutadır, ancaq onları götürüb bazar-dükana getmək o qədər də rahat deyil”. İkipudluq nəhəng sikkələr Avstriya zərbxanasının digər “əsər”inə – Vyana filarmoniyasına həsr olunmuş və dünyada ən çox satılan 2000 şillinq dəyərində qızıl sikkələrin buraxılmasının 15 illiyi münasibətilə hazırlanmışdır.

Onların dəfələrlə böyüdülmüş oxşarlarının da üz tərəfində Vyana filarmoniyasının, arxa tərəfində isə nəfəs alətlərinin və simli alətlərin təsvirləri həkk olunmuşdur. Nəhəng sikkələr artıq Ginnesin rekordlar kitabına düşməyə namizəddir.

YAPONİYADA DÜNYADA ƏN İRİ QIZIL SİKKƏLƏRİN SATIŞINA BAŞLANACAQ

MÜƏLLİFLƏ ƏLAQƏ

Bölmənin digər xəbərləri