Yaponiyada əcnəbi turistlərin sayı rekord səviyyədə azalıb
Tokio, 2 may, AZƏRTAC
Mart ayı Yaponiya mehmanxanaları və qonaq evlərində qalan əcnəbi turistlərin sayı ötən ilin eyni dövrü ilə müqayisədə 85,9 faiz azalaraq 1 milyon 180 min nəfər təşkil edib.
AZƏRTAC xəbər verir ki, bu barədə Yaponiya Turizm İdarəsi məlumat yayıb. Məlumata görə, bu, 2011-ci ilin aprelində Yaponiyanın şimal-şərqində baş vermiş dəhşətli zəlzələ və sunamidən sonra müşahidə edilən 81,3 faiz həddini də ötüb.
Qeyd edilir ki, turistlərin axınının kəskin azalması koronavirus pandemiyasının bütün turizm sənayesinə böyük təsiri nəticəsində baş verib.
Bildirilib ki, mehmanxanalarda daimi qalanların, o cümlədən yaponların ümumi sayı martda 23 milyon 610 min nəfər təşkil edib. Bu, ötən ilin müvafiq göstəricisindən 49,6 faiz azdır.
Yaponiyadakı bütün mehmanxanaların doluluq səviyyəsi də təqribən 30 faiz aşağı düşüb.
Vurğulanır ki, azalma tendensiyası, ölkədə fövqəladə vəziyyət rejimi hələ də davam etdiyinə görə uzun müddət çəkəcək yaz tətili dövründə də müşahidə ediləcək.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
