Yaponiyanın Aya eniş edən aparatı fəaliyyətini bərpa edib
Bakı, 29 yanvar, AZƏRTAC
Yaponiyanın Aya eniş edən aparatı elektrik təchizatı probleminə görə birhəftəlik fasilədən sonra yenidən fəaliyyətini bərpa edib.
AZƏRTAC The Japantimes saytında istinadla xəbər verir ki, Yaponiya Aerokosmik Tədqiqatlar Agentliyi bazar günü gecə saatlarında aparatla əlaqəni bərpa etdiyini və nasazlığın aradan qaldırıldığını bildirib.
Agentlik qeyd edib ki, işıqlanma şəraitinin dəyişməsindən sonra aparatın günəş batareyaları yenidən işə düşüb.
Ayın tədqiqi üçün “Smart Lander” (SLIM) kosmik aparatının enişdən sonra enerji istehsal edə bilmədiyi üçün yanvarın 20-dən etibarən hərəkətsiz vəziyyətdə qaldığı bildirilib.
Məlumatda qeyd olunub ki, kosmik gəmi bir neçə saat akkumulyatorla işləyib. Daha sonra elektrik enerjisini bərpa edənədək onu söndürmək qərarı verilib.
SLİM kraterdəki hədəfindən 55 metr aralıda Şioli kimi tanınan kraterin kənarına enib. Yaponiya ABŞ, keçmiş Sovet İttifaqı, Çin və Hindistandan sonra Aya eniş edən beşinci ölkə olub.
Bölmənin digər xəbərləri
