Bakı, 25 fevral (AZƏRTAC). Yaponiyanın Azərbaycandakı səfirliyinin “2013-cü il üçün Yaponiyanın bülleteni” çapdan çıxmışdır.

AZƏRTAC xəbər verir ki, nəfis tərtib olunmuş bülletenin üz qabığında ötən ilin dekabr ayında Bakıda keçirilmiş UNESCO-nun Qeyri-Maddi Mədəni İrs üzrə Hökumətlərarası Komitəsinin 8-ci sessiyasında Yaponiyanın “Vaşoku: yeni il ərəfəsində xüsusi yer tutan ənənəvi yapon mətbəxi”nin UNESCO-nun Qeyri-Maddi Mədəni İrs üzrə Reprezentativ Siyahısına daxil edildiyi diqqətə çatdırılmışdır.

Bülletendə ötən ilin oktyabr ayında Rəşid Behbudov adına Azərbaycan Dövlət Mahnı Teatrında yaponiyalı musiqiçilərin “Şiniçi Kinoşita Birliyi” adlı konserti, Milli İncəsənət Muzeyində keçirilmiş “Müqayisəli Yaponiya” mövzusunda fotosərgi haqqında maraqlı məlumatlar yer almışdır.

Nəşrdə, həmçinin Yaponiya müdafiə nazirinin müavini Masahisa Satonun ölkəmizə, Azərbaycanın rabitə və informasiya texnologiyaları naziri Əli Abbasovun Yaponiyaya səfərinə dair materiallar da diqqəti cəlb edir.

Yaponiyanın ölkəmizin inkişafını dəstəkləyən layihələrə, iki ölkə arasında bölgələrarası mübadiləyə, dövlətlər arasında kosmik sektor sahəsində əməkdaşlığa dair yazılar da bülletenin maraqlı səhifələrindəndir.

Nəşrdə Göyçayda, İsmayıllıda, Lənkəranda yapon filmlərinin nümayişi, paytaxtımızda yapon dili müsabiqəsinin nəticələri də öz əksini tapmışdır.

Bülletenin sonunda Yaponiyanın ölkəmizə ötən ilin noyabrında təyin olunmuş səfiri Tsuquo Takahaşinin salamlama nitqi yer almışdır. Burada Azərbaycanın dövlət müstəqilliyini əldə etdikdən sonra çətin bir dövr yaşamasına baxmayaraq əldə etdiyi uğurlardan söhbət açılmış, dəfələrlə ölkəmizə səfər etmiş Tsuquo Takahaşinin hər gəlişində Bakının sürətli inkişafına heyran olduğu bildirilmişdir.

Yaponiya səfirinin salamlama nitqində deyilir: “Mən, fəaliyyətim müddətində qoyulan məqsədlərin reallaşması üçün var gücümlə çalışacağam. Bunun üçün indiyədək əldə olunan iqtisadi əməkdaşlıqla bərabər, təhsil və mədəniyyət sahələrinə də əlavə güc sərf edərək, Yaponiya-Azərbaycan arasında bütün sahələrdə, eyni zamanda, siyasi və iqtisadi sahələrdə əlaqələri inkişaf etdirmək arzusundayam”.

“2013-cü il üçün Yaponiyanın bülleteni” iki ölkə arasında əlaqələr haqqında geniş təsəvvür yaranması üçün maraqlı mənbədir.