DÜNYA
Yaponiyanın Baş naziri Latın Amerikasının beş ölkəsinə səfərə yola düşüb
![Yaponiyanın Baş naziri Latın Amerikasının beş ölkəsinə səfərə yola düşüb](/files/2014/2/1200x630/1408712509421560777_1200x630.jpg)
Tokio, 26 iyul (AZƏRTAC). Yaponiyanın Baş naziri Şinzo Abenin Latın Amerikasının beş ölkəsinə səfəri başlayıb.
İyulun 25-də Baş nazir Tokionun “Haneda” beynəlxalq hava limanından Meksikaya yola düşüb. Səfər çərçivəsində Ş.Abe Trinidad və Tabaqonu, Kolumbiyanı, Çili və Brazilayanı da ziyarət edəcək.
Yola düşməzdən əvvəl jurnalistlərə müsahibə verən Baş nazir bildirib ki, bu səfər onun insanların məskunlaşdığı bütün qitələrdə olduğunu göstərəcək. Buna görə də Ş.Abe bu dəfəki səfərini “bütün Yer kürəsini əhatə edən diplomatiya” adlandırıb. Səfərin məqsədi isə region ölkələri ilə əməkdaşlığı genişləndirməkdir.
Baş nazir qeyd edib ki, 600 milyon əhalisi olan Latın Amerikası qeyri-məhdud potensiala malik perspektivli yeni bazar deməkdir. Səfər zamanı onu 70-dən çox yapon şirkətinin nümayəndəsinin müşahidə edəcəyini vurğulayan Ş.Abe əmin olduğunu bildirib ki, nəticədə onların biznesi üçün yeni imkanlar açılacaq.
Bu, beynəlxalq tədbirlərdə iştiraklar çıxılmaqla, Yaponiya Baş nazirinin həmin regiona son 10 ildə ilk səfəridir. Baş nazirin Yaponiyaya avqustun 4-də dönəcəyi bildirlir.
Vüqar Ağayev
AZƏRTAC-ın xüsusi müxbiri
Tokio