Bakı, 8 noyabr (AZƏRTAC). Noyabrın 8-də Yasamal Rayon Heydər Əliyev Mərkəzində 9 noyabr - Dövlət Bayrağı Gününə və 12 noyabr - Konstitusiya Gününə həsr olunmuş tədbir keçirilmişdir.

AZƏRTAC xəbər verir ki, əvvəlcə tədbir iştirakçıları Mərkəzin foyesində ulu öndər Heydər Əliyevin büstünü ziyarət etmiş, önünə gül dəstələri qoymuşlar. Daha sonra onlar məktəblilərin əl işlərindən ibarət kompozisiyaya, kitab sərgisinə baxmışlar.

Yasamal Rayon İcra Hakimiyyətinin başçısı İbrahim Mehdiyev çıxış edərək demişdir ki, Azərbaycan Respublikası müstəqilliyini bərpa etdikdən sonra başımızın üstündə dalğalanan üçrəngli bayraq milli suverenliyimizin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrilmişdir. Bayrağım bizim azadlıq məfkurəsinə, milli-mənəvi dəyərlərə və ümumbəşəri ideallara sadiqliyimizi nümayiş etdirir.

İcra hakimiyyətinin başçısı Prezident İlham Əliyevin Sərəncamı ilə hər il noyabrın 9-nun Azərbaycan Dövlət Bayrağı Günü kimi qeyd olunmasının əhəmiyyəti haqqında danışmışdır. O demişdir ki, bu bayramın təsis edilməsi Azərbaycan Prezidentinin dövlət atributlarına verdiyi dəyərin bariz nümunəsidir.

İ.Mehdiyev demişdir ki, 1995-ci il noyabrın 12-də ümummilli lider, müasir Azərbaycan dövlətinin qurucusu Heydər Əliyevin bilavasitə rəhbərliyi ilə hazırlanmış və ümumxalq səsverməsi yolu ilə qəbul olunmuş müstəqil dövlətimizin ilk Konstitusiyası Azərbaycan tarixində yeni bir səhifə açmışdır. Tarixi zərurət kimi qəbul edilmiş Əsas Qanunumuz gələcək illərdə dövlətimizin siyasi, iqtisadi və sosial inkişafının hüquqi əsaslarını təsbit etmişdir.

Ağır Cinayətlərə Dair İşlər Üzrə Məhkəmənin hakimi Ənvər Seyidov ümummilli lider Heydər Əliyevin Azərbaycanın dövlət müstəqilliyinin qorunub saxlanılması, möhkəmləndirilməsi və inkişaf etdirilməsi yolunda misilsiz xidmətləri, Azərbaycan xalqının strateji seçimi olan demokratik, hüquqi və dünyəvi dövlət quruculuğu istiqamətində respublikada bütün sahələrdə apardığı köklü islahatlar barədə danışmışdır. O, qəbul edilən mütərəqqi qanunların, respublikamızın qoşulduğu beynəlxalq-hüquqi aktların, məhkəmə-hüquq sisteminin yenidən qurulmasının ölkəmizdə demokratik, hüquqi dövlətin möhkəm əsasını və sarsılmaz bünövrəsini yaratdığını vurğulamışdır.

Bakı Dövlət Universitetinin hüquq fakültəsinin dekanı Əmir Əliyev müstəqil Azərbaycanın ilk Konstitusiyasının qəbul olunmasının tarixi-siyasi və hüquqi əhəmiyyəti barədə danışmış, Ali Qanunumuzun xalqın mənafelərini təmin edən ən demokratik oxşar sənədlər sırasında layiqli yerini tutduğunu qeyd etmişdir. O, ümummilli liderin Azərbaycan dövlətçiliyinin möhkəmləndirilməsi sahəsində həyata keçirdiyi bütün işlərin Prezident İlham Əliyev tərəfindən uğurla davam etdirildiyini, ölkədə aparılan hüquqi islahatların qanunvericilik bazasının möhkəmləndirilməsinə və daha səmərəli işləməsinə, mütərəqqi hüquq məkanına inteqrasiyanı sürətləndirmək üçün beynəlxalq hüquq normalarının səmərəli tətbiqinə yönəldiyini vurğulamışdır.

Azərbaycan Yazıçılar Birliyinin üzvü, ədəbiyyatşünas alim Salatın Əhmədli və YAP-ın Yasamal rayon təşkilatının sədri Fikrət İsmayılov bildirmişlər ki, bu gün dövlət müstəqilliyinin müqəddəs rəmzlərinin geniş təbliği, gənclərə dərindən aşılanması azərbaycançılıq və müstəqillik kimi sosial-siyasi, milli mənəvi dəyərlərə dərin ehtiramın əsas amilidir. Dövlətimizin siyasi pasportu olan bayrağa hörmət və ehtiram hər bir insanın böyük çətinliklər hesabına müstəqilliyə qovuşan qüdrətli Azərbaycan dövlətinə, xalqına olan məhəbbətinin təcəssümüdür.

Sonda Dövlət Bayrağı Günü və Konstitusiya Günü ilə bağlı sənədli film nümayiş etdirilmişdir.