“YENİ AZƏRBAYCAN PARTİYASINA XİDMƏT ETMƏK VƏTƏNƏ, MİLLƏTƏ, MÜSTƏQİL AZƏRBAYCAN DÖVLƏTİNƏ XİDMƏT ETMƏK DEMƏKDİR”
“İki sahil” qəzetinin YAP-ın 10 illiyi münasibətilə rəngli, yüksək poliqrafik səviyyədə nəşr olunmuş 32 səhifəlik xüsusi buraxılışının üz qabığında Azərbaycan Prezidenti, Yeni Azərbaycan Partiyasının sədri Heydər Əliyevin bu sözləri, respublikanın bayrağı və xəritəsi fonunda dövlətimizin başçısının fotoşəkli verilmişdir.
İkinci-dördüncü səhifələrdə məşhur “91-lər”in 1992-ci ilin oktyabrın 15-də Heydər Əliyevə ünvanlanmış “Azərbaycan sizin sözünüzü və qəti qərarınızı gözləyir” müraciəti, xalqımızın liderinin ziyalılara cavabı dərc edilmişdir.
Yeni Azərbaycan Partiyasının yarandığı vaxt onun sədri Heydər Əliyevin “Azadlıq” radiosu ilə dünyaya yayımlanan fikirləri, partiyanın bəyanatı, “YAP-ın tarixi müstəqil Azərbaycanın tarixidir” yazıları, habelə Azərbaycan Prezidenti, Yeni Azərbaycan Partiyasının sədri Heydər Əliyevin partiyanın ikinci qurultayındakı nitqi oxuculara təqdim olunmuşdur.
Partiya sədrinin birinci müavini, ARDNŞ-in birinci vitse-prezidenti, Milli Məclisin deputatı İlham Əliyevin YAP-ın ikinci qurultayında “Yeni Azərbaycan Partiyası dünənin, bu günün və gələcəyin partiyasıdır” sərlövhəli çıxışı diqqəti cəlb edir.
Xüsusi buraxılışın “Azərbaycan dünyaya günəş kimi doğacaq” ümumi başlığı altında verilmiş qoşa səhifəsindəki materiallar ümummilli lider Heydər Əliyevə xalq məhəbbətini, onun beynəlxalq aləmdəki böyük nüfuzunu bir daha xatırladır.
Partiyanın yaradılmasında böyük xidmətləri olmuş YAP-ın sədr müavinlərinin - Murtuz Ələsgərovun, Əli Nağıyevin, Sirus Təbrizlinin, icraçı katib Əli Əhmədovun, onun müavinləri Siyavuş Novruzovun, Mübariz Qurbanlının, Bahar Muradovanın yazılarında YAP-ın keçdiyi yol, respublikamızın müstəqilliyinin qorunub möhkəmlənməsində, iqtisadiyyatının inkişaf etdirilməsində, xalqın maddi rifahının yaxşılaşdırılmasında partiyanın göstərdiyi xidmətlər geniş təhlil olunur.
YAP 1998-ci ildə keçirilmiş prezident seçkilərindən sonra yeni inkişaf mərhələsinə qədəm qoymuşdur. “XXI əsrin partiyası və lideri” sərlövhəli geniş yazıda YAP-ın gücünün onun yaradıcısı və lideri Heydər Əliyevdə olduğu təsdiq edilməklə, İlham Əliyev amili də önə çəkilir, “İlham Əliyevə olan ehtiyac Heydər Əliyevə olan ehtiyacın davamıdır” kimi haqlı bir nəticə çıxarılır.
Partiyanın İdarə heyətinin üzvləri Asya Manafovanın, Şahlar Əsgərovun, Ramiz Mirzəyevin, Yaqub Əliyevin, Siyasi Şurasının üzvləri Eldar İbrahimovun, Ağabəy Əsgərovun, Məmmədtağı Cəfərovun, Səyyad Aranın yazılarında vurğulanır ki, YAP daim haqqı, ədaləti, müdafiə etmiş, cəmiyyətin bütün təbəqələrini birləşdirən siyasi birliyə, xalq istəyinin ifadəçisinə çevrilmişdir.
Xüsusi buraxılış Prezident Heydər Əliyevin bu sözləri ilə tamamlanır: “Mən Yeni Azərbaycan Partiyası ilə bərabərəm və partiyanın bugünkü vəziyyətini görərkən çox sevinirəm və hesab edirəm ki, Yeni Azərbaycan Partiyası yaşayacaq və fəaliyyət göstərəcəkdir”.
Qəzetin redaktoru, Milli Məclisin deputatı Vüqar Rəhimzadəni və kollektivin üzvlərini təbrik edir, onlara yeni yaradıcılıq sevincləri arzulayırıq.
Bölmənin digər xəbərləri
