ZƏRDABDA “HEYDƏR ƏLİYEV YENİ AZƏRBAYCAN PARTİYASININ YARADICISIDIR” MÖVZUSUNDA DƏYİRMİ MASA KEÇİRİLMİŞDİR
AZƏRTAC xəbər verir ki, Zərdabda “Heydər Əliyev Yeni Azərbaycan Partiyasının yaradıcısıdır” mövzusunda dəyirmi masa keçirilmişdir.
Zərdab Rayon İcra Hakimiyyəti və Yeni Azərbaycan Partiyası rayon təşkilatının birgə təşkilatçılığı ilə keçirilən dəyirmi masanın iştirakçıları əvvəlcə ümummilli liderimiz Heydər Əliyevin adını daşıyan parka getmiş, ulu öndərin heykəli önünə əklil və çiçəklər qoymuşlar. İştirakçılar, habelə Heydər Əliyev muzeyini gəzmiş, ulu öndərin həyat və fəaliyyəti ilə bağlı fotoşəkillərlə və digər sənədlərlə tanış olmuşlar.
YAP rayon təşkilatının qərargahında keçirilən tədbirdə təşkilatın sədri Tofiq Abdullayev “Ümummilli liderimiz Heydər Əliyev Yeni Azərbaycan Partiyasının yaradıcısıdır” mövzusunda məruzə etmişdir.
Məruzə və çıxışlarda XX əsrin 80-ci illərin sonu, 90-cı illərin əvvəllərində Azərbaycanın son dərəcə ağır, mürəkkəb və ziddiyyətli dövrü xarakterizə edilmiş, belə bir vaxtda böyük dövlət və siyasi xadim Heydər Əliyevin vətənə dönərək xilaskarlıq missiyasını üzərinə götürməsi tariximizin ən parlaq səhifəsi kimi səciyyələndirilmişdir.
Dəyirmi masanın iştirakçıları bildirmişlər ki, ulu öndər Heydər Əliyev siyasi kursunun layiqli davamçısı, Prezident İlham Əliyevin rəhbərliyi ilə bu gün Azərbaycan regionun ən qüdrətli dövlətinə çevrilmişdir. Siyasi sabitlik hökm sürməklə iqtisadiyyatın bütün sahələri dinamik inkişaf edir, dövlətin nüfuzu möhkəmlənir. Azərbaycan bir sıra beynəlxalq əhəmiyyətli layihələrin müəllifidir. Bütün bunlar Heydər Əliyev ideyalarının, Heydər Əliyev uzaqgörənliyinin təntənəsidir.
Dəyirmi masada böyük Heydər Əliyevin Vətən, xalq qarşısında misilsiz xidmətlərini təhlil edən natiqlər ulu öndərin özündən sonra Azərbaycana, eləcə də artıq böyük qüvvəyə çevrilən və öz ətrafında xeyli həmfikri birləşdirən YAP-a İlham Əliyev kimi gənc lider, siyasi varis bəxs etdiyindən iftixar duyduqlarını söyləmişlər.
Qarşıdakı seçkilərdə onu əvəz edə bilən lider görmədiklərini inamla vurğulayan natiqlər, Prezident İlham Əliyevin rəhbərliyi ilə son illər ölkədə qazanılan misilsiz nailiyyətlərdən danışmışlar. Tədbirdə belə bir fikir səsləndirilmişdir ki, hər bir azərbaycanlının Prezidenti olduğunu öz əməli ilə sübut edən İlham Əliyev artıq ümumxalq məhəbbəti qazanmışdır.
Tədbirin sonunda Yeni Azərbaycan Partiyasına qəbul olunan bir qrup gəncə üzvlük vəsiqələri təqdim olunmuşdur.
