CƏMİYYƏT
Polis əməkdaşları Xırdalanda avtobus və taksilərdə tibbi maska taxmayan şəxslərə qarşı reyd keçiriblər VİDEO
Bakı, 16 iyul, AZƏRTAC
Abşeron Rayon Polis İdarəsinin Dövlət Yol Polisi Şöbəsinin əməkdaşları ictimai nəqliyyatda tibbi maskalardan istifadə etməyən şəxslərin aşkarlanması istiqamətində Xırdalan şəhərində növbəti nəzarət-profilaktiki tədbir həyata keçiriblər.
Daxili İşlər Nazirliyinin mətbuat xidmətindən AZƏRTAC-a bildiriblər ki, tədbir zamanı ictimai nəqliyyatdan istifadə edən sərnişinlərlə izahedici söhbətlər aparılıb. Yol polisləri onları ictimai nəqliyyatda olan zaman tənəffüs yollarını qoruyan fərdi vasitələrdən – qoruyucu tibbi maskalardan istifadə etməyin zəruriliyi barədə məlumatlandırıblar.
Profilaktik tədbir zamanı ictimai nəqliyyat vasitələrində tibbi maskadan istifadə etməyən sərnişinlər və sürücülər Abşeron Rayon Dövlət Yol Polisinin əməkdaşları tərəfindən müəyyənləşdiriliblər. Tibbi maskadan istifadə etməyən şəxslər avtobuslardan düşürülüb, onlar barəsində inzibati tənbeh tədbirləri görülüb.
Həmçinin taksilərdə şəffaf arakəsmələr quraşdırmayan sürücülər, eləcə də avtomobilin ön oturacağında əyləşən və tibbi maskadan istifadə etməyən sərnişinlər barədə də qanunauyğun tədbirlər görülüb.
Abşeron rayonu ərazisində yol hərəkəti təhlükəsizliyinin təmin olunması, ictimai nəqliyyatda tibbi maskadan istifadə etməyən şəxslərin müəyyənləşdirilməsi məqsədilə profilaktik tədbirlər mütəmadi həyata keçiriləcək.