“193” saylı vahid Çağrı mərkəzi vasitəsilə vətəndaşın müraciətləri operativ araşdırılır
Bakı, 18 oktyabr, AZƏRTAC
“193” saylı vahid Çağrı mərkəzi vasitəsilə vətəndaşın müraciətləri çevik cavablandırılır, operativ araşdırılır.
Əmlak Məsələləri Dövlət Komitəsindən (ƏMDK) AZƏRTAC-a bildirilib ki, komitə ölkə vətəndaşlarının müraciətlərinə həssaslıqla baxılması, göstərilən ictimai xidmətlərdə operativlik və şəffaflığın artırılması istiqamətində işləri təkmilləşdirir. ƏMDK xidmətlərdə vətəndaş məmnunluğunun artırılması, fəaliyyət istiqamətləri üzrə yaranan sualların tez bir zamanda cavablandırılması kimi məsələlərə xüsusi diqqətlə yanaşır. Bu məqsədlə istifadəyə verilən “193” vahid Çağrı mərkəzi komitənin fəaliyyəti ilə bağlı müxtəlif qaynar xətləri bir yerdə cəmləşdirir, araşdırma tələb edən sualları aidiyyəti yerlərə ünvanlamaqla məsələnin həllində xüsusi rol oynayır. Komitənin bütün fəaliyyət sferasına aid olan müraciətlər vahid Çağrı mərkəzi vasitəsilə cavablandırılır.
Vətəndaşlar dövlət əmlakının özəlləşdirilməsi, icarəsi və istifadəsi, daşınmaz əmlak üzərində mülkiyyət hüquqlarının qeydiyyatı, özəlləşdirilmə prosesində keçirilən hərraclarla bağlı suallarını, habelə torpaqların kadastr uçotu, keyfiyyət göstəricilərinin müəyyən edilməsi, istifadə vəziyyəti, təyinatının dəyişdirilməsi, ünvan və digər məsələlərlə əlaqədar yalnız bir nömrəyə - “193” saylı vahid Çağrı mərkəzinə ünvanlaya bilərlər. Vahid Çağrı mərkəzinin yaradılmasında məqsəd vətəndaş müraciətlərinin çevik cavablandırılmasının, operativ araşdırılmasının və bu işlərin daha rasional aparılmasının təmin edilməsidir.
Statistik göstəricilərə görə, cari ilin sentyabr ayı ərzində “193” vahid Çağrı mərkəzinə 250-ə yaxın müraciət daxil olub. Sentyabr ayı ərzində ən çox sorğu tipli müraciətlər daxil olub. Başqa sözlə, müraciətlərin 84 faizə yaxını sorğu tiplidir.
Regionlar üzrə daxil olan müraciətlərin səviyyəsində paytaxt sakinlərinin aktivliyi müşahidə olunur. Belə ki, bu kateqoriya üzrə müraciətlərin 73 faizə yaxını Bakı sakinlərinin payına düşür.
Regionlar üzrə alınan bu nəticə bölgələrdə aparılan maarifləndirmə işlərinin daha da intensivləşməsini şərtləndirir. Komitə isə bunu nəzərə alaraq, statistik göstəricilərin yaxşılaşdırılması üçün fəaliyyətini daha da təkmilləşdirir, bölgələrdə bu istiqamətdə işgüzar forumlar keçirir.
Müraciətlərin mövzularına gəldikdə, “Əmlaka dair çıxarış”, “Özəlləşdirilmə”, “Torpaq sahələrinin kadastrı” üstünlük təşkil edir. Daha dəqiq desək, müraciətlərin 31 faizdən çoxu əmlaka dair çıxarışla, 20 faizə yaxını özəlləşdirilmə ilə, 10 faizə yaxını kadastrla qalanı isə fərqli mövzularla bağlıdır.
Hərraclarla bağlı sorğuların ilk beşlikdə yer alması görülən işlərin nəticəsidir. Belə ki, hərracların təşkili sahəsində aşkarlığın təmin edilməsi, yeni innovativ addımların atılması, prosedurların sadələşdirilməsi vətəndaş marağına səbəb olub. Araşdırma tələb edən məsələlər də müraciətlərin strukturunda yer alıb. Bu kateqoriyada çıxarışla, kadastrla bağlı daxil olan suallar çoxluq təşkil edir. Başqa sözlə, araşdırma tələb edən məsələlərin 30 faizindən çoxu çıxarışla, 22 faizə yaxını kadastrla bağlıdır.
Daxil olan müraciətlər zamanı daha çox qeydiyyatla bağlı xidmət haqqı və rüsumlar, daşınmaz əmlak barədə yüklülük, məhdudiyyət arayışları, ümumi mülkiyyətin bölünməsi, alqı-satqı müqavilələri, vərəsəlik əsasında mülkiyyət hüququnun tanınması və digər özəl mülkiyyət məsələləri ilə bağlı suallar verilir.
Vahid Çağrı mərkəzi vasitəsilə vətəndaşlara daşınmaz əmlakla bağlı hüquqi yardımlar göstərilir. Bundan başqa onlar “193” saylı qaynar xəttinə zəng etməklə dövlət reyestrindən çıxarışın alınması, texniki pasportun hazırlanması, ipoteka, lizinq və digər hüquqi əməliyyatların qeydiyyatı ilə bağlı elektron xidmətlər haqqında da məsləhət ala bilərlər.
Çağrı mərkəzi müraciətlərin qəbulunu və cavablandırılmasını ödənişsiz həyata keçirir. Komitənin səlahiyyətlərinə aid olan suallar daxil olduqda Çağrı mərkəzi onları birbaşa və ya müraciət vərəqəsi tərtib edərək araşdırdıqdan sonra cavablandırır. Cavab sorğuçunu qane etmədikdə, operator tərəfindən ona müvafiq qanuna uyğun olaraq yazılı şəkildə komitəyə müraciət etməsi təklif olunur. Çağrı mərkəzinə şikayət daxil olduqda isə onlar qeydiyyata alınaraq cavablandırılması üçün aidiyyəti struktur vahidinə göndərilir. Həmin struktur, şikayəti qanunvericilikdə nəzərdə tutulmuş müddətdən gec olmayaraq cavablandırılmasını təmin edir.
Çağrı mərkəzi canlı və səsli menyu rejimində olmaqla fasiləsiz fəaliyyət göstərir. Canlı rejim həftənin iş günləri saat 9.00-dan 18.00-dək həyata keçirilir. Səsli menyu rejimi isə iş vaxtından sonrakı vaxtlarda, həftənin qeyri-iş günləri və bayram günlərində fəaliyyət göstərir.
Qeyd edək ki, ən son texnologiyalar əsasında hazırlanan vahid Çağrı mərkəzi mükəmməl proqram təminatı vasitəsilə fəaliyyət göstərir. Vahid Çağrı mərkəzinin fiziki və texniki imkanları yüksəkdir. Belə ki, gənc və ixtisaslı kadrlar işə cəlb edilib. Bu isə bir neçə vətəndaşın müxtəlif suallarının eyni anda cavablandırılmasına şərait yaradır.
Bölmənin digər xəbərləri
