2003-CÜ İL ÜÇÜN MƏDƏNİYYƏT SAHƏSİNDƏ ƏMƏKDAŞLIGA DAİR PROTOKOL İMZALANMIŞDIR
Dekabrın 9-da Azərbaycan Respublkasının mədəniyyət naziri Polad Bülbüloğlu və ölkəmizdə rəsmi səfərdə olan İran İslam Respublikasının mədəniyyət və İslami İrşad naziri Əhməd Məscid Camei ölkələrimiz arasında 2003-cü il üçün mədəniyyət sahəsində əməkdaşlığa dair protokol imzalamışlar.
Bu münasibətlə Mədəniyyət Nazirliyində keçirilən mərasimdə Azərbaycanla İran arasında mədəni əlaqələrin genişləndirilməsinə respublikamızda böyük diqqət verildiyi vurğulanmışdır. Mədəniyyət Nazirliyindən AZƏRTAC-a demişlər ki, mərasimdə 2002-ci ilin mayında dövlətimizin başçısı Heydər Əliyevin İrana rəsmi səfəri xatırlanmış və həmin səfərdə ölkələrimiz arasında əməkdaşlığın, xüsusən mədəni əlaqələrin genişləndirilməsi sahəsində imzalanan müqavilənin əhəmiyyətindən danışılmışdır. Qeyd olunmuşdur ki, imzalanan bu protokol həmin müqavilənin tərkib hissəsidir. Belə ki, həmin sənədə əsasən nazirliklərin 2003-cü ildə həyata keçirəcəkləri tədbirlər 11 bənddən ibarət protokolda öz əksini tapmışdır.
Əhməd Məscid Camei İran nüməyəndə heyətinin Azərbaycana səfərinin əhəmiyyətindən danışdı, onlara göstərilən qonaqpərvərlik üçün minnətdarlığını bildirdi. Mədəni əlaqələrin genişləndirilməsində informasıya nümayəndələrinin rolunu xüsusi qeyd etdi.
Axırda nazirlər jurnalistlərin suallarına cavab verdilər.
Mərasimdə Azərbaycanın İrandakı səfiri Abbasəli Həsənov və İİR-in ölkəmizdəki elçisi Əhəd Qəzai iştirak edirdilər.
Bölmənin digər xəbərləri
