MƏDƏNİYYƏT
20 YANVAR FACİƏSİ QURBANLARININ ƏZİZ XATİRƏSİ YAD EDİLDİ
Bakı Bələdiyyə Teatrında Ədliyyə Nazirliyinin Məhkəmə Qərarları İcrası Baş İdarəsinin tabeçiliyində olan müəssisələrin kollektivlərinin iştirakı ilə 20 Yanvar faciəsinin 13-cü ildönümünə həsr olunmuş tədbir keçirilmişdir.
Şəhidlərimizin əziz xatirəsi bir dəqiqəlik sükutla yad edilmişdir.
İdarənin rəis müavini, ədliyyə polis-polkovniki Natiq Talıbov, islah işləri və sosial müdafiə şöbəsinin rəisi, ədliyyə polis-polkovniki Niyazi Məmmədov, Milli Məclisin deputatı Amalya Pənahova və başqaları çıxışlarında demişlər ki, keçmiş sovet dövləti tərəfindən Azərbaycan xalqına qarşı həyata keçirilən bu qanlı faciə onun milli qürurunu və iradəsini sındıra bilməmişdir. İnsanlığa qarşı törədilmiş və ən ağır cinayətlərdən biri olan 20 Yanvar faciəsinin qurbanları böyük mənəvi güc nümayiş etdirərək şəhidlik zirvəsinə yüksəlmişlər. Müstəqillik arzumuzu daha da gücləndirmiş qəhrəman övladlarımızın əziz xatirəsi qəlblərdə daim yaşayacaqdır.