307 NÖMRƏLİ ORTA MƏKTƏBİN İBTİDAİ SİNİF MÜƏLLİMİ LEYLA SÜLEYMANOVANIN ÇIXIŞI
Məktəbimizin müəllim kollektivi adından Sizi ürəkdən salamlayır, yeni tikilmiş məktəbimizə “Xoş gəlmisiniz!” deyirəm. Bu gözəl gündə bizimlə birlikdə olduğunuz, sevincinizi bizimlə paylaşdığınız üçün Sizə və Mehriban xanıma dərin təşəkkürümüzü bildiririk. Məncə, bu, yeni dərs ilinin daha da uğurlu olacağına ən böyük mənəvi stimuldur.
Bu gün hər kəs üçün əlamətdar bir gündür. Şagirdlərin də, onların valideynlərinin də uzun illər çəkən məktəb həsrətinə son qoyuldu. Bakı şəhərində, Azərbaycanda ən böyük məktəblərdən biri qısa müddət ərzində bizim qəsəbəmizdə tikilib istifadəyə verilmişdir. Bizə göstərdiyiniz qayğı, diqqət üçün Sizə dərin minnətdarlığımızı bildiririk. Möhtərəm Prezident, məktəb tikmək müqəddəs işdir. Məktəb tikən əlləriniz var olsun. Sağ olun ki, yeni və daha intellektual nəslin yetişməsi üçün əlinizdən gələni əsirgəmirsiniz. Azərbaycan xalqı olaraq inanırıq ki, yeni məktəblərin tikilməsi, onların kompyuterləşdirilməsi, yeni avadanlıqla təchizatı sahəsində aparılan və bundan sonra da aparılacaq bütün işlər ümumilikdə təhsilimizin səviyyəsinin yüksəlməsinə müsbət təsirini göstərəcəkdir. Hazırda Azərbaycan təhsili inkişaf dövrünü yaşayır, təhsil sahəsində əsaslı islahatlar həyata keçirilir. Təhsilin məzmunu yeniləşir, yeni dərsliklər, dərs vəsaitləri hazırlanır və yüksək səviyyədə çap edilir. Bütün bu yeniliklər məktəb həyatına çox sürətlə daxil olur.
Möhtərəm Prezident, biz bilirik ki, bütün bu işlərin hamısı Sizin Azərbaycan təhsilinə göstərdiyiniz diqqətin, qayğının nəticəsidir. Azərbaycan təhsilinə göstərdiyiniz bu diqqət və qayğıya görə Sizə müəllimlər, valideynlər, şagirdlər adından dərin minnətdarlığımızı bildiririk.
Mən Mehriban xanım Əliyevanın bu sahədə əməyini xüsusi qeyd etmək istəyirəm. Ulu öndər Heydər Əliyevin adını daşıyan Fondun prezidenti Mehriban xanımın təhsil sahəsində əməyi çoxdur və bu, hər kəs üçün örnək olmuşdur. Fondun son iki ildə təhsillə bağlı gördüyü işləri onilliklərə bərabər hesab etmək olar. Mehriban xanım, biz buna görə sizə dərin minnətdarlığımızı bildiririk.
Möhtərəm Prezident, biz inanırıq və əminik ki, müstəqil Azərbaycanın xalqı məhz Sizin rəhbərliyiniz altında daha da yüksək zirvələrə çatacaqdır.
Azərbaycan, qayalarda bitən bir çiçək,
Azərbaycan, çiçəklərin içində qaya.
Mənim könlüm bu torpağı vəsf eyləyərək,
Azərbaycan dünyasından baxar dünyaya.
Azərbaycan, mayası nur, qayəsi nur ki,
Hər daşından alov dilli ox ola bilər.
Azərbaycan deyiləndə ayağa dur ki,
Ana yurdun ürəyinə toxuna bilər.
Çox sağ olun, diqqətinizə görə təşəkkür edirəm.
X X X
Prezident İlham Əliyev mərasimdə nitq söylədi.
X X X
Sonra Prezident İlham Əliyev və Mehriban xanım Əliyeva məktəbin pedaqoji kollektivi ilə görüşüb söhbət etdilər, onlarla və şagirdlərlə xatirə şəkli çəkdirdilər.
Bölmənin digər xəbərləri
