“Vətəndaş, zəhmət olmasa, əlinizdəki əşyanı cihaza yerləşdirin...” Metro polislərinin bir günü - REPORTAJ VİDEO
Bakı, 2 iyul, G.Mahmudlu, M.Cəfərov, O.Kərimov, AZƏRTAC
Gündəlik həyatımızda kriminal elementlərlə qarşılaşmadığımız (yaxud nadir hallarda qarşılaşdığımız) üçün polisin fəaliyyətini qabarıq şəkildə görməyə bilərik. Lakin Azərbaycanın hər vətəndaşı bilir ki, hazırkı təhlükəsizlik mühiti həm də polisin gözəgörünməz və önləyici fəaliyyətinin nəticəsidir.
İnsanların kütləvi toplandığı, sıx cəmləşdiyi məkanlar istənilən təxribat üçün ən əlverişli mühitdir. Lakin belə məqamlarda hökm sürən sabitliyi məhz hüquq-mühafizə orqanları əməkdaşlarının ayıq-sayıqlığının və çevikliyinin sayəsində müşahidə edə bilirik. Qısacası, istər yerin üstündə, istərsə də yerin altında – yəni, metro stansiyalarında təhlükəsizliyimiz Azərbaycan polisinin digər dövlət qurumları ilə birgə gecə-gündüz usanmadan xidməti vəzifə borcunu icra etməsinin nəticəsində təmin olunur.
AZƏRTAC-ın əməkdaşları 2 iyul – Azərbaycan Polisi Günü ərəfəsində “Bakı Metropoliteni” Qapalı Səhmdar Cəmiyyətinin “Nizami” və “Elmlər Akademiyası” stansiyalarında metro polislərinin fəaliyyətini yaxından izləyiblər.
Hər gün yüz minlərlə sərnişinin xidmətində dayanan metro polisləri fəaliyyətləri ilə əsl fədakarlıq nümunəsi göstərirlər
“Vətəndaş, zəhmət olmasa, əlinizdəki əşyanı cihaza yerləşdirin”. Müxtəlif məkanlara daha tez çatmaq üçün istifadə etdiyimiz metronun girişində bu cümləni eşitməyən yəqin ki, çox az insan olar. Metro sərnişinləri arasında qaydaları bilərək ona əməl edənlər də, özünü bilməyən kimi göstərmək istəyənlər də var. Yerli sakinlərin və paytaxta gələn qonaqların daha sıx istifadə etdiyi metroda bir kiçik səhv, diqqətdən yayınan hansısa nüans xoşagəlməz hadisəni, faciəni qaçılmaz edə bilər. Metro polisləri həm cihaza yerləşdirilən əşyaları diqqətlə analiz edir, hansısa şübhəli əşya olduqda müvafiq tədbirlər görür, cihaza yerləşdirilməsi mümkün olmayan çanta və əşyalara isə ayrıca baxış keçirirlər. Pik saatlarda gərgin işləyən metro polislərinin məsuliyyəti daha böyük olur. Ümumilikdə isə hər gün yüz minlərlə sərnişinin xidmətində dayanan metro polisləri fəaliyyətləri ilə əsl fədakarlıq nümunəsi göstərirlər. Onların öz xidməti vəzifə borclarını layiqli icra etmələri nəticəsində metro istifadəçilərinin təhlükəsizliyi ən yüksək səviyyədə təmin edilir.
Metropolitendə ictimai asayiş müasir avadanlıqlardan istifadə olunmaqla qorunur
Bu gün ölkəmizdə ictimai asayişin və ictimai qaydanın keşiyində ayıq-sayıq dayanan Azərbaycan polisi istənilən təxribatın qarşısını operativ şəkildə almaq iqtidarındadır. Sevindirici haldır ki, Azərbaycan polisi peşəkarlığına görə yalnız regionun deyil, bir sıra aparıcı Avropa ölkələrinin təhlükəsizlik orqanlarını da üstələyir.
Daxili İşlər Nazirliyinin mətbuat xidmətinin əməkdaşı, polis leytenantı Lumu İsrəfilli AZƏRTAC-a müsahibəsində bildirib ki, metropolitendə ictimai asayişin qorunması və sərnişinlərin təhlükəsizliyinin təmin olunması nazirlik tərəfindən daim diqqət mərkəzində saxlanılır. Həmin istiqamətdə metropolitendə polis idarəsinin əməkdaşları tərəfindən gündəlik olaraq bütün zəruri tədbirlər görülür. Ümumiyyətlə, metropolitendə bütün texniki imkanlar mövcuddur və nəzarət tədbirləri mütəmadi olaraq davam etdirilir. Metro stansiyalarında olarkən şübhə doğuran şəxslərin yoxlanılması, həmçinin qadağan olunmuş əşyaların metropoliten ərazisinə buraxılmasının qarşısının alınması müasir avadanlıqlardan istifadə edilməklə həyata keçirilir. Metro stansiyalarında olarkən təhlükəsizlik qaydalarını pozan şəxslər polislər tərəfindən kamera, edilən vətəndaş müraciətləri əsasında, yaxud birbaşa aşkarlanarsa, həmin şəxslər barəsində qanunamüvafiq tədbirlər görülür”.
Onlar həm vətəndaşların təhlükəsizliyini qoruyur, həm onlara kömək edir, həm də xoş günlərini bölüşürlər
Ümummilli Lider Heydər Əliyevin dediyi kimi “Polis peşəsi ağır peşədir. O, bir tərəfdən cəsarət, şəxsi mətanət, ikinci tərəfdən bilik, dərrakə, elm, təhsil, təcrübə tələb edir”. Əlbəttə, vətəndaşların konstitusion hüquqlarını qorumaq, əmin-amanlığın keşiyində mətanətlə dayanmaq yüksək keyfiyyətlərə malik bir polis işçisinin öhdəsindən gələ biləcəyi bir işdir. Bunun üçün onun cəldliyi, qorxmazlığı və hər hansı bir davranışı, baxışı anında sezə, təhlil edə bilmək bacarığı olmalıdır. Metropolitendə sərnişinlərin bəzən həddən artıq sıx toplaşdığı zamanlarda hər hansı bir xoşagəlməz hadisəni önləmək isə olduqca çətindir. Bunun üçün metro polislərinin işi təkcə girişdə əşyaları və şübhəli şəxsləri yoxlamaqla yekunlaşmır, onlar eskalatorlarda, vestibüllərdə dayanmadan hərəkət edir, sərnişinlərin maneəsiz gediş-gəlişinə, təhlükəsizlik qaydalarına riayət etməsinə nəzarəti həyata keçirirlər.
Bundan əlavə, metroda sərnişinlər kömək üçün güvənli şəkildə polislərə müraciət edirlər. Kimisi gedəcəyi yolu soruşur, kimisi nəqliyyat kartının balansını artırmaq üçün yardım istəyir, kimisi isə səhhətində yaranan problemə görə polisi səsləyir. Bütün hallarda metro polisləri sərnişinlərin bütün çağırışlarını və müraciətlərini dinləyir və əllərindən gələn dəstəyi göstərirlər. Onlar gündəlik müxtəlif xarakterlərdə, fərqli əhvallarda olan sərnişinlərlə qarşılaşır, hər birini səbir və təmkinlə yola salmağı bacarırlar. Bəzən isə uzun illər eyni metro stansiyasından istifadə edən sərnişinlərlə metro polisləri arasında doğmalıq yaranır, həmin şərəfli və məsuliyyətli peşə sahiblərinə öz minnətdarlıqlarını təbəssüm və hal-əhval tutmaqla ifadə edirlər. Sərnişinlər arasında xoş günlərini polis işçiləri ilə bölüşənlər də az olmur...
Əminik ki, ölkəmizdə sabitliyin, ictimai rifahın və təhlükəsizliyin qarantı olan polislərimiz bundan sonra da vəzifə borclarına sadiq qalaraq onlara bəslənən inam və etimadı doğruldacaqlar. 107 yaşın mübarək, Azərbaycan polisi!
Bölmənin digər xəbərləri
