Respublika üzrə biçin prosesinin ən qısa müddətdə başa çatdırılması proqnozlaşdırılır – Şəkidən reportaj VİDEO
Şəki, 3 iyul, AZƏRTAC
Respublikanın ən iri taxılçılıq rayonlarından olan Şəkidə taxıl biçini davam edir. Adətən iyul ayının ilk on günlüyündə rayonda taxıl biçininə yekun vurulurdusa, bu il havaların qeyri-sabit keçməsi bunu bir qədər gecikdirib.
AZƏRTAC-ın bölgə müxbirinin məlumatına görə, rayonun aran kəndlərində işlər yekunlaşmaq üzrə olsa da, dağətəyi yaşayış məntəqələrində biçin sürətlə davam edir.
Şəkinin ən iri taxıl zəmiləri Turan qəsəbəsi, Şorsu, Kiçik Dəhnə, Böyük Dəhnə, Öyrət, Qayabaşı, Sarıca və digər kəndlərin ərazilərindədir. Ötən ildən fərqli olaraq, bu il havaların yağıntılı keçməsi taxılın bitişinə müsbət təsir edib. Lakin fasiləsiz yağıntılar biçinin gecikməsi ilə nəticələnib.
Rayon Dövlət Aqrar İnkişaf Mərkəzinin direktoru Azər Şamilov biçin başlayandan ötən müddətdə bir neçə dəfə yağıntıların müşahidə edildiyini və hər dəfə də işlərin bir neçə gün ləngidiyini bildirib.
“Şəkidə təxminən 60 min hektar sahədə taxıl əkini həyata keçirilib. Bunun 22 min hektarı arpa, 38 min hektarı buğda sahələridir. Arpa sahələrinin 75 faizində, buğda sahələrinin isə 15 faizində biçin başa çatıb. Hər hektarda orta məhsuldarlıq 30 sentner təşkil edir”, - deyən Azər Şamilov onu da əlavə edib ki, biçin prosesinə “Aqroservis” ASC-nin balansında olan 31 ədəd, həmçinin fiziki və hüququ şəxslərin mülkiyyətində olan 89 ədəd, eləcə də əvvəlcədən biçini başa çatdırılan rayonlardan 42 ədəd kombayn cəlb olunub.
Bəs, respublika üzrə taxıl biçini prosesi necə gedir? Şəkinin Baltalı kəndində taxıl biçinlərini müşahidə edən Kənd Təsərrüfatı Nazirliyinin nümayəndəsi Vüqar Hüseynov sualımıza cavabında bildirib ki, əksər rayonlarda, xüsusilə də mərkəzi aran rayonlarında arpa biçini başa çatıb. “Arpa biçini yekunlaşan rayonların sayı təxminən 25-ə çatır. Hazırda həm mərkəzi aran, həm də dağətəyi rayonlarda aktiv biçin prosesi davam edir”, - deyə o qeyd edib.
Onun sözlərinə görə, hava şəraiti imkan verəcəyi təqdirdə respublika üzrə biçin prosesinin ən qısa müddətdə başa çatdırılması proqnozlaşdırılır. Hazırda respublika üzrə orta məhsuldarlığın 34 sentnerə çatdığını bildirən Vüqar Hüseynov bu göstəricinin buğdada 34,7 sentner, arpada isə 32 sentner təşkil etdiyini söyləyib.
Söhbət zamanı məlum oldu ki, ölkə üzrə taxıl zəmilərinə 1400-ə yaxın kombayn cəlb edilib. Kombaynların dislokasiyasının planla həyata keçirildiyini deyən KTN-in nümayəndəsi, hazırda dağətəyi bölgələrdə biçin prosesinin sürətləndiyini, növbəti mərhələdə isə dağlıq ərazilərdə prosesə başlanılacağını vurğulayıb.
Bölmənin digər xəbərləri
