COP29-un İqlim üzrə gənclər çempionu: Gənclərin səsi iqlim siyasətində eşidilməlidir – MÜSAHİBƏ VİDEO
Bakı, 8 iyul, Pərvanə Qafarova, AZƏRTAC
Azərbaycan ötən il dünya miqyasında ən vacib tədbirlərdən birinə - BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi edib. COP29-un İqlim üzrə gənclər çempionu Leyla Həsənova AZƏRTAC-a müsahibəsində bu vəzifənin məqsədləri, gənclərin prosesə cəlb olunması istiqamətində həyata keçirdiyi təşəbbüslər və Azərbaycan gəncləri üçün açılan imkanlar barədə fikirlərini bölüşüb. Müsahibəni təqdim edirik.
– Leyla xanım, sizi bu mühüm vəzifəyə gətirən yol necə başladı? İqlim üzrə gənclər çempionu olmaq nə deməkdir?
– Mən hər zaman gənclərlə işləməyə, könüllü fəaliyyətinə və beynəlxalq proseslərdə iştirak etməyə çox maraq göstərmişəm. Hazırda Qoşulmama Hərəkatı Gənclər Təşkilatının sədri kimi fəaliyyət göstərirəm. Təşkilat Azərbaycanın Qoşulmama Hərəkatına sədrliyi dövründə Şəbəkə kimi yaradılıb. 2022-ci ilin iyulunda Şuşa Sazişinin imzalanması ilə Şəbəkə Təşkilata çevrilib. Ətraf mühit məsələləri mənim üçün hər zaman önəmli olub. Keçən ilin yanvar ayından etibarən COP29-un İqlim üzrə gənclər çempionu olaraq fəaliyyət göstərirəm. Bu rolun əsas məqsədi gənclərin iqlim proseslərinə daha fəal və mənalı şəkildə qoşulmasına şərait yaratmaqdır. Gənc iqlim çempionu olmaq mənim üçün gənclərin səsini çatdırmaq və onları bu prosesə cəlb etmək deməkdir.
– COP29-da gənc çempion kimi prioritetiniz nədən ibarət idi? Nəyə nail olmağa çalışdınız?
– Mənim əsas prioritetim gənclərin COP29-a hazırlıq prosesində və konfrans zamanı mənalı şəkildə iştirakını təmin etmək idi. Təkcə tədbirə qatılmaq deyil, bu prosesin bir hissəsinə çevrilmək komandamız ucun çox vacib idi. Bu məqsədlə bir neçə istiqamətdə çalışdıq: beynəlxalq və regional məsləhətləşmələr apardıq, iqlim üzrə yay düşərgəsi təşkil etdik, Azərbaycan və digər ölkələrdən gənc müəllimləri bir araya gətirib onların iqlim üzrə biliklərini təkmilləşdirdik. Eyni zamanda, Uşaq və Gənclər Pavilyonu üzrə beynəlxalq tərəfdaşlarla birgə işlədik ki, COP29-da bu pavilyon yüksək səviyyədə təmsil olunsun. Həmçinin konfrans zamanı keçirilmiş tədbirlərdə gənclərə siyasətçilər ilə dialoq qurmaq üçün imkanlar yaratdıq. Çünki COP29 bizim ucun sadəcə bir tədbir deyildi – bu, gələcək nəsillərin taleyini müəyyən edən qlobal danışıqlardır və gənclərin orada yeri mütləq olmalıdır.
– Azərbaycanın COP29-a ev sahibliyi etməsi ölkənin gəncləri üçün hansı fürsətləri yaratdı?
– Bu, Azərbaycan gəncləri üçün böyük fürsət oldu. İlk dəfə idi ki, ölkəmiz belə bir iqlim sammitinə ev sahibliyi edirdi və gənclər bu prosesə sadəcə izləyici kimi qoşulmadılar, onun bir hissəsinə çevrildilər.
COP29 sayəsində gənclərimiz iqlim siyasəti, beynəlxalq əməkdaşlıq və diplomatiya sahəsində təcrübə qazandılar. Biz də bu fürsətdən maksimum istifadə etməyə çalışdıq və hələ də çalışırıq – təlimlər, məsləhətləşmələr, könüllülük proqramları vasitəsilə onları prosesə cəlb edirik. Eyni zamanda, bu, ölkəmizdə gənclərə yeni şəbəkələr qurmaq imkanı, eləcə də ideya və təşəbbüslərini dünya ilə bölüşmək üçün çox dəyərli bir platforma oldu.
– Sizcə, gənclərin iqlim siyasətində səsi yetərincə eşidilirmi? Bu səsi necə gücləndirmək olar?
– Təəssüf ki, bir çox hallarda gənclərin səsi iqlim siyasətində kifayət qədər nəzərə alınmır. Onlar tədbirlərə simvolik olaraq tez-tez dəvət edilsələr də, qərar qəbulu prosesində iştirak imkanları məhdud olur. Bu səsi gücləndirmək üçün ilk növbədə gənclərə real imkanlar təqdim olunmalıdır – məsələn, məsləhətləşmələrə dəvət etmək, onların təşəbbüslərinə diqqət yetirmək və bu təşəbbüsləri qərarlara inteqrasiya etmək. Eyni zamanda, maliyyə və texniki dəstək vacibdir ki, gənclər öz təşəbbüslərini həyata keçirə bilsinlər. COP29 zamanı əsas məqsədlərimdən biri də məhz bu olub – gənclərin səslərinin sadəcə eşidilməsi deyil, qərarvericilər tərəfindən nəzərə alınması üçün real platformalar yaratmaq olub.
Bölmənin digər xəbərləri
