® “Baku Steel Company” “Azərboru”nun modernizasiyasının ilk mərhələsini tamamlayıb VİDEO
Cənubi Qafqazın ən böyük polad istehsalçısı olan “Baku Steel Company” QSC (BSC) Sumqayıt şəhərində yerləşən “Azərboru” istehsalat sahəsində genişmiqyaslı modernizasiya layihəsinin ilk mərhələsini tamamlayıb. Layihə şirkətin uzunmüddətli inkişaf strategiyası çərçivəsində həyata keçirilir və “Azərboru”nun ixracyönlü məhsullara əsaslanan, müasir, yüksək texnoloji istehsalat sahəsinə çevrilməsində mühüm addımdır.
Şirkətin tikişsiz polad boru istehsalı sahəsində strateji təşəbbüsləri iki amillə dəstəklənir:
• 2024-cü ilin noyabr ayında Amerika Neft İnstitutundan (API) beynəlxalq sertifikatın alınması. 2025-ci ilin may ayında keçirilən illik yoxlamadan sonra istehsal proseslərinin API tələblərinə tam uyğunluğu təsdiqlənib və bu, ABŞ bazarı da daxil olmaqla, boru məhsullarının ixracının genişləndirilməsi üçün imkanlar açıb.
• 2024-2025-ci illərdə yeni sinif boruların istehsalı üçün polad pəstahların keyfiyyətinin artırılmasını təmin etmək məqsədilə BSC tərəfindən poladəritmə sahəsində Bakı şəhərində həyata keçirilən texnoloji modernizasiya. Vakuum qazsızlaşdırma qurğusunun istismara verilməsi, pəstahların qapalı tökmə texnologiyasının mənimsənilməsi, legirlənmiş elementlərin ərintiyə verilməsi üçün müasir avadanlıqların tətbiqi mühüm layihələrdəndir. Daxili keyfiyyəti idarəetmə standartları da daim təkmilləşdirilir.
“Azərboru”nun modernizasiyasının ilk mərhələsinin əsas məqsədləri:
• Boru məhsullarının istehsal həcminin artırılması;
• Yeni ölçü diapazonları və möhkəmlik sinifləri üzrə məhsul çeşidinin yerli və ixrac bazarları üçün genişləndirilməsi;
• Gələcək məhsul inkişafı üçün texnoloji bazanın yaradılması;
• Regionda BSC-ni fərqləndirə bilən böyük əlavə dəyərə malik yüksək texnologiyalı məhsulların bazarlarına çıxmaq.
Layihənin icrasına İspaniya, İtaliya, Almaniya, Rusiya, Hindistan, Çexiya və Ukraynadan olan avadanlıq və mühəndislik sahəsində ixtisaslaşmış tərəfdaşlar cəlb edilib. Əsas tərəfdaşlar arasında “Danobat”, “Lazzari”, “GH”, “Karl Deutsch”, “Nordinkraft”, “Prestar” və sahənin digər lider şirkətləri yer alır.
İstehsalat dövrünün mərhələləri üzrə əsas layihələr:
İsti yayma sahəsində, modernizasiya çərçivəsində TPA-250 yayma dəzgahı avadanlıqlarının yenilənməsi elementləri ilə əsaslı şəkildə təmir olunub. Yayma dəzgahının və qızdırıcı sobanın əsas komponentləri dəyişdirilib, “GH Induction/Ajax TOCCO” şirkətinin istehsalı olan yayma xəttindəki boruların induksiya qızdırıcı sisteminin və yeni “Lazzari” düzləndirici dəzgahının quraşdırılması üçün hazırlıq işləri görülüb. Yeni avadanlıq xəttin məhsuldarlığını artırır və yeni növ boruların istehsalına imkan yaradır. Bütün bu işlər qəzasız şəkildə başa çatdırılıb - ümumi həcm 15 min adam/saatdan çox olub.
Qoruyucu borular sahəsində əhəmiyyətli dəyişikliklər baş verib. Burada borulara və birləşdirici muftalara yiv açmaq üçün müasir “Danobat” avadanlıqları, avtomatlaşdırılmış boru daşınma xətti və mufta quraşdırma kompleksləri istifadəyə verilib ki, bu da mufta birləşmələrinin məhsuldarlığının əhəmiyyətli dərəcədə artmasına və stabil keyfiyyətinin yaxşılaşdırılmasına imkan verir.
Keyfiyyətə nəzarət sistemi də xeyli gücləndirilib. “Nordinkraft” şirkətinin boruların keyfiyyətinə nəzarət üçün yeni ultrasəs qurğusu və “Karl Deutsch” maqnit-toz defektoskopu - boruların və muftaların keyfiyyətini dəqiq diaqnostika etməyə imkan verən avadanlıqlar istifadəyə verilib.
Modernizasiya şirkətə enerji səmərəliliyi və davamlı inkişaf prinsiplərinə cavab verən müasir istehsal mühiti yaratmağa imkan verib. Yeni nəsil avadanlıqlar enerji xərclərinin azaldılmasını, xammal itkilərinin minimuma endirilməsini və istehsal olunan məhsulların sabit keyfiyyətini təmin edir. Avtomatlaşdırılmış idarəetmə sistemləri sayəsində texnoloji proseslər dəqiq nəzarətdə saxlanılır və çevik şəkildə idarə olunur.
Əlavə olaraq, muftaların sinklənməsi sahəsində tullantı sularının təmizlənməsi üçün qurğunun montajı tamamlanıb və yaxın zamanda istifadəyə verilməsi nəzərdə tutulur. Bu sistem şirkətin ətraf mühitə təsirinin minimuma endirilməsi və dayanıqlı inkişaf prinsiplərinə sadiqliyini əks etdirir.
Modernizasiyanın ilk mərhələsinin nəticələri:
• İstehsal gücü 60 min tona qədər - ikiqat artırılıb;
• Yeni ölçü diapazonunda (245 mm diametrə, 20 mm divar qalınlığına qədər) məhsulların istehsalına başlanılıb;
• P110 sinfi də daxil olmaqla, yeni məhsul siniflərinin seriya istehsalı mənimsənilib;
• Müasir avadanlıqlarda işləmək üçün personala təlim keçirilib, işçilərin ümumi ixtisas səviyyəsi yüksəldilib.
“Azərboru”nun modernizasiyasının ilk mərhələsinin həyata keçirilməsi mühüm istehsal nəticəsi olmaqla yanaşı, həm də BSC-nin texnoloji həllər, beynəlxalq tərəfdaşlıq və strateji baxışa əsaslanan dayanıqlı inkişaf modeli qurmaq bacarığının sübutudur. Şirkət Azərbaycanın metallurgiya sektorunda aparıcı oyunçu və qlobal bazarda etibarlı təchizatçı kimi rolunu gücləndirərək istehsal güclərini inkişaf etdirməyə, məhsulların çeşidini genişləndirməyə və keyfiyyətini təkmilləşdirməyə davam edəcək.
Bölmənin digər xəbərləri
