Buxarestdə Zəfər Günü münasibətilə rəsmi ziyafət keçirilib VİDEO
Buxarest, 4 noyabr, AZƏRTAC
Azərbaycanın Rumıniyadakı səfirliyinin təşkilatçılığı ilə 8 Noyabr – Zəfər Günü münasibətilə Buxarestdə rəsmi qəbul keçirilib.
AZƏRTAC xəbər verir ki, tədbirdə Rumıniyada akkreditə olunmuş diplomatik nümayəndəliklərin rəhbərləri və əməkdaşları, hökumət qurumlarının təmsilçiləri, ictimai xadimlər, media nümayəndələri, bu ölkədə yaşayan azərbaycanlılar, eləcə də Buxarestdə səfərdə olan Azərbaycan nümayəndə heyətinin üzvləri iştirak ediblər.
Səfir Qüdsi Osmanov tədbirdə çıxış edərək Zəfər Gününün Azərbaycan xalqının milli qürur və iftixar tarixi olduğunu vurğulayıb. O bildirib ki, Prezident, Ali Baş Komandan İlham Əliyevin rəhbərliyi ilə Azərbaycan Ordusu 2020-ci ilin 44 günlük Vətən müharibəsində tarixi ədaləti bərpa edib, ölkənin ərazi bütövlüyünü təmin edib.
Səfir diqqətə çatdırıb ki, bu Qələbə Azərbaycan xalqının birliyi, əzmi və liderinin qətiyyəti nəticəsində mümkün olub. O, həmçinin avqustun 8-də Vaşinqtonda ABŞ Prezidentinin iştirakı ilə Azərbaycanla Ermənistan arasında imzalanmış birgə Bəyannamənin bütün regionun inkişafı və rifahı üçün böyük əhəmiyyət kəsb etdiyini vurğulayıb. Qüdsi Osmanov qeyd edib ki, bu sənəd Cənubi Qafqazda davamlı sülh və əməkdaşlıq üçün yeni mərhələnin əsasını qoyub.
“Bu gün Azərbaycan regionda sülhün, sabitliyin və əməkdaşlığın təmin olunması istiqamətində mühüm təşəbbüslərlə çıxış edir. Zəfər Günü təkcə Azərbaycanın deyil, bütün regionun gələcək rifahın, sabitliyin və qarşılıqlı hörmət prinsiplərinə əsaslanan yeni əməkdaşlıq modelinin simvoluna çevrilib”, – deyə diplomat vurğulayıb.
Sonra çıxış edən Rumıniya Baş nazirinin müavini Marian Neakşu Azərbaycan xalqına Zəfər Günü münasibətilə təbriklərini çatdırıb. O bildirib ki, Rumıniya ilə Azərbaycan arasında strateji tərəfdaşlıq münasibətləri qarşılıqlı etimad və dostluq prinsiplərinə əsaslanır. Marian Neakşu deyib ki, Rumıniya Azərbaycanı regionda sabitliyin və inkişafın təmin olunmasında mühüm tərəfdaş hesab edir, bu əməkdaşlıq gələcəkdə daha da genişlənəcək.
Daha sonra Türkiyənin Rumıniyadakı səfiri Özgür Kıvanç Altan çıxış edərək Azərbaycan xalqını Zəfər Günü münasibətilə təbrik edib. O qeyd edib ki, Azərbaycanın 2020-ci ildə qazandığı tarixi Qələbə Türk dünyasının birliyini və qardaşlığını daha da möhkəmləndirib. “Azərbaycanın Zəfəri bütün türk dövlətləri üçün qürur mənbəyidir. Türkiyə hər zaman Azərbaycanın yanında olub, bundan sonra da dost və qardaş ölkə kimi onunla həmrəyliyini davam etdirəcək”, – deyə səfir vurğulayıb.
Azərbaycan xalqını bu tarixi gün münasibətilə təbrik edən Rumıniya müsəlman icmasının müftisi Yusuf Murat Zəfər Gününün təkcə ölkəmizin deyil, bütün müsəlman dünyasının qürur günü olduğunu bildirib. Müfti qeyd edib ki, Azərbaycanın ədalətli mübarizəsi sülh və sabitliklə nəticələnib, bu Zəfər ədalətin, birliyin və inamın təntənəsidir.
Tədbir çərçivəsində 8 Noyabr – Zəfər Gününə həsr olunmuş videoçarx nümayiş etdirilib.
Ziyafət bədii proqramla davam edib. Konsert proqramında Azərbaycanın milli musiqi nümunələri səsləndirilib, qonaqlara mətbəximizin ləziz təamları təqdim olunub.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
