Bakı, 17 fevral (AZƏRTAC). İstanbulda Yaşar Doğunun xatirəsinə həsr olunan Beynəlxalq güləş turniri başa çatmışdır.

AZƏRTAC xəbər verir ki, 42-ci dəfə keçirilən turnirdə sərbəst güləş üzrə Azərbaycan yığma komandası 1 qızıl, 2 gümüş və 2 bürünc medala sahib olmuşdur. Bu nəticə ilə yığmamız komanda hesabında üçüncü yeri tutmuşdur.

Turnirdə Türkiyə birinci, ABŞ komandası ikinci sırada qərarlaşmışlar.

Bütün görüşlərini qələbə ilə başa vuran Olimpiya mükafatçımız Xetaq Qazyumov (97kq) turnirin qalibi olmuşdur. O, ardıcıl olaraq Türkiyə yığmasının 5 güləşçisini mübarizədən kənarlaşdırmışdır.

Məhəmməd Müslümov (65 kq) da rəqiblərindən üstün olmuş və finala yüksəlmişdir. Ancaq finalda İtaliya güləşçisi ilə görüşdə uduzan təmsilçimiz gümüş medalla kifayətlənmişdir.

Finaladək maneəsiz irəliləyən digər güləşçimiz turnirin ikinci günündə mübarizəyə qoşulan Emin Əzizov (70 kq) olmuşdur. Ardıcıl olaraq Keçmiş Yuqoslaviya Respublikası Makedoniya, Türkiyə və Tacikistan güləşçilərini üstələyən E.Əzizov finalda digər Türkiyə təmsilçisinə uduzaraq gümüş medala sahib olmuşdur.

Yarışda 61 kiloqram çəki dərəcəsində mübarizə aparan Əhmədnəbi Qvarzatilov finalın bir addımlığında məğlub olmuşdur. Yaponiya və Türkiyə güləşçilərini üstələyən Ə.Qvarzatilov yarımfinalda monqolustanlı idmançıya uduzmuşdur. Ancaq medal yolunda həlledici görüşdə Türkmənistan pəhləvanından üstün olan təmsilçimiz bürünc mükafat qazanmışdır.

Turnirdə 97 kiloqram çəki dərəcəsində yarışan digər təmsilçimiz Roman Bəkirov da bürünc medala sahib olmuşdur.

Görüşlərin idarə edilməsində ölkəmizi Beynəlxalq dərəcəli hakim Vüqar Şükürov təmsil etmişdir. Həmçinin Yaşar Doğunun xatirəsinə həsr olunmuş 42-ci Beynəlxalq turnirin Beynəlxalq Güləş Federasiyası (FİLA) tərəfindən nümayəndəsi azərbaycanlı Olimpiya dərəcəli hakim Hicran Şərifov olmuşdur.