Qəbələdə keçirilən məhsul bayramında 300-dək yerli və xarici şirkətin nümayəndəsi iştirak edib VİDEO
Qəbələ, 28 avqust, Şahnəzər Bəşirov, AZƏRTAC
Avqustun 28-də Qəbələ rayonunda “Tarla günləri” çərçivəsində respublika əhəmiyyətli məhsul bayramı keçirilib.
AZƏRTAC xəbər verir ki, aqrar sektorda son yenilikləri və imkanları özündə əks etdirən mərasimdə 300-ə yaxın yerli və xarici şirkətin, fermer təsərrüfatlarının 2000-dən çox nümayəndəsi iştirak edib.
Tədbirdə kənd təsərrüfatı nazirinin müavini İlham Quliyev, Qəbələ Rayon İcra Hakimiyyətinin başçısı Səbuhi Abdullayev, “Gilan Holdinq”in kənd təsərrüfatı sektorunun müdiri, təşkilat komitəsinin sədri Əbülfəz Məlikov, Neft Kimya Prosesləri İnstitutunun direktoru, akademik Vaqif Abbasov çıxış ediblər. Natiqlər ölkəmizdə ilk dəfə olaraq “Kənd təsərrüfatı ili” çərçivəsində may-avqust aylarında Qəbələdə keçirilən “Tarla günləri”nin əhəmiyyətindən danışıblar.
Bildirilib ki, “Gilan Holdinqin” təşkil etdiyi məhsul bayramında məqsəd aqrar sektordakı son yenilikləri və imkanları təqdim etməklə yanaşı, istehlakçıları və ixracatçıları bir araya gətirməkdən ibarətdir. Əsas üstünlük isə aqrar sektor üzrə texnologiyaya və sənayedəki yeniliklərə verilib. “Tarla günləri” kiçik və orta sahibkarlığın, xüsusilə fermer və ailə təsərrüfatlarının inkişafını təşviq edir, biznes subyektləri üçün kənd təsərrüfatı barədə daha dəqiq və daha asan məlumat əldə etmək imkanı yaradır, istehlakçılara aqrar sektorun potensialı haqqında dolğun informasiya çatdıra bilir.
“Gilan Holdinq”in kənd təsərrüfatı sektorunun müdiri, təşkilat komitəsinin sədri Əbülfəz Məlikov qeyd edib ki, 2015-ci ilin ölkəmizdə “Kənd təsərrüfatı ili” elan olunması ilə bağlı Prezident İlham Əliyevin 2015-ci il 12 yanvar tarixli Sərəncamı Azərbaycanda kənd təsərrüfatının inkişafına dövlət dəstəyinin gücləndirilməsi, yeni çağırışlara uyğun olaraq sahə üzrə strateji hədəflərin və institusional dəyişikliklərin müəyyən edilməsi aqrar sektorun keyfiyyətcə yeni mərhələyə keçidinin təməlini qoyub. Qısa zamanda əhalinin ərzaq təhlükəsizliyinin təmin edilməsi, aqrar sahədə ixrac potensialının artırılması məqsədilə ölkədə müasir aqroparklar və iri fermer təsərrüfatları təşkil edilməsi üçün müxtəlif layihələr hazırlanıb. Ə.Məlikov qeyd edib ki, “Tarla günləri” çərçivəsində kənd təsərrüfatı ilə məşğul olan insanlara, aqrar sahədə çalışan elm adamlarına, məhsul istehsalı və satışı ilə məşğul olan şəxslərə üzbəüz görüşmək, önəmli məsələləri müzakirə etmək və fikir mübadiləsi aparmaq, məhsul və xidmətlərin müqayisəli təqdimatı, təşviqat və marketinq imkanları, sərbəst mühit əldə etmək şəraiti yaradılıb.
Məlumat verilib ki, “Tarla günləri” layihəsi aqrar sahənin inkişafına xidmət edir. Kənd təsərrüfatı ilə məşğul olan hər bir fermer layihə çərçivəsində Qəbələ rayonunda ayrılan 28 hektar torpaq sahəsində may-avqust ayları ərzində əkin, becərmə və biçin işlərini həyata keçirib, məhsullarını nümayiş etdirib. Həmin ərazidə fermerlər bostan, tərəvəz və paxlalı bitkiləri əkib-becəriblər. Bununla yanaşı, aqrotexnika ilə məşğul olan 4 şirkət öz texnika və avadanlıqlarını, gübrə satışı ilə bağlı 6 şirkət, yemçilik üzrə 2 şirkət, bitki və toxumçuluq üzrə 11 şirkət, eləcə də Azərbaycanın tanınmış şirkəti olan “Gilan Holdinq” istehsal etdiyi müxtəlif çeşiddə məhsullarını nümayiş etdirib.
Sonra tədbir iştirakçıları kənd təsərrüfatı məhsullarının, bitki dərmanlarının, texnikaların, gübrələrin, qida məhsullarının, şirə və içkilərin, laboratoriya avadanlıqlarının, heyvandarlıq və bitkiçilik məhsullarının sərgisi ilə tanış olublar. Sərgidə 50-ə yaxın firma və şirkət öz məhsulunu nümayiş etdirib. Mərasimdə “Tarla günləri” layihəsi çərçivəsində ən uğurlu nailiyyətlərinə görə 4 şirkətin rəhbərinə “Qızıl zəhmətkeş” diplomu təqdim olunub.
Tədbirdə hökumət təşkilatlarının, xarici ölkə səfirliklərinin nümayəndələri, ictimai birliklərin, təhsil müəssisələrinin, elmi-tədqiqat institutlarının təmsilçiləri və kənd təsərrüfatı sektorunda çalışan sahibkarlar iştirak ediblər.
Bölmənin digər xəbərləri
