ELM VƏ TƏHSİL
Azərbaycan Müəllim İnkişafı Mərkəzi “CELTA” tədris mərkəzi kimi fəaliyyət göstərəcək
Bakı, 21 iyun, AZƏRTAC
Kembric Universitetinin İngilis dili üzrə Qiymətləndirmə (Cambridge Asessment English) bölümü Azərbaycan Müəllim İnkişafı Mərkəzinin (AMİM) ölkəmizdə ilk rəsmi “CELTA” tədris mərkəzi kimi akkreditə olunduğunu elan edib.
AMİM-dən AZƏRTAC-a bildirilib ki, iyulun 23-dən avqustun 17-dək keçiriləcək kursda dil müəllimlərinə və müəllim olmaq istəyənlərə Azərbaycanda təhsil almaq imkanı təqdim ediləcək. Proqramı beynəlxalq təlimçilər Qari Nikson və Keti Qeraqi aparacaqlar.
“CELTA” yetkin şəxslərə ingilis dili öyrədə bilmək üçün müəllimlərə lazımi bacarıq, bilik və təcrübə aşılayır. Bu mərkəz “Cambridge English”də özünəməxsus statusa malik, dünya miqyasında işəgötürənlər tərəfindən tələb olunan kvalifikasiyadır. Belə ki, Kvalifikasiyalar və Kredit Strukturunda beşinci səviyyəyə malik “CELTA” kvalifikasiyası Böyük Britaniyanın Kvalifikasiya və İmtahan Tənzimləmə İdarəsi (Ofqual) tərəfindən tənzimlənir.
Tədris və öyrənmə kontekstini rəhbər tutan “CELTA” proqramı dil biliklərini, müxtəlif tədris kontekstləri üçün planlaşdırma və resursları, tədrisdə bacarıq və peşəkarlığı inkişaf etdirən 120 saatlıq təlim kursudur.