Respublika Uşaq Kitabxanasının hazırladığı metodik vəsaitlər istifadəçilərə təqdim edilib

Bakı, 31 mart, AZƏRTAC

F.Köçərli adına Respublika Uşaq Kitabxanasının Elmi-metodika şöbəsi tərəfindən “Ümumdünya Kitab və Müəlliflik Hüququ Günü”, həmçinin “Elektron mühitdə uşaq və yeniyetmələrin mütaliəsi” adlı metodik vəsaitlər hazırlanaraq virtual rejimdə istifadəçilərə təqdim edilib.

“Ümumdünya Kitab və Müəlliflik Hüququ Günü” adlı metodik vəsaitin birinci hissəsində həmin günün yaranma tarixindən, eləcə də kitablara və müəlliflərə dünya miqyasında ehtiram göstərmək, hər kəsi bəşəriyyətin məkan və zaman sərhədlərini aşaraq ideyaları paylaşmaq üçün ən gözəl ixtira, eyni zamanda sülhün bərqərar edilməsinin başlıca qüvvəsi olan kitabları əldə etməyə təşviq etmək kimi məsələlərdən bəhs edilib. Həmin metodik vəsaitin ikinci hissəsində “Ümumdünya Kitab və Müəlliflik Hüququ Günü” ilə bağlı keçiriləcək tədbirlərin planı tərtib olunub.

“Elektron mühitdə uşaq və yeniyetmələrin mütaliəsi” adlı digər metodik vəsaitdə isə mütaliənin rolu, kitabxana işinin məqsədi, elektron kitabxanalarla ənənəvi, fərqli və oxşar cəhətlər haqqında fikirlər, eləcə də vəsaitin ikinci hissəsində dahi şəxsiyyətlərin mütaliə və kitabxana haqqında fikirləri yer alıb.

Təqdim edilən vəsaitlər kitabxanaçılar, metodistlər, müəllimlər, yeniyetmə və gənclər, ümumilikdə bütün istifadəçilər üçün nəzərdə tutulub.