REGİONLAR


Şuşanın dirçəlməsi təkcə Qarabağın, Azərbaycanın yox, bütün türk dünyasının yüksəlişidir

Sumqayıt, 11 may, Ətrabə Rzayeva, AZƏRTAC

Qarabağ Zəfərinin tarixi əhəmiyyəti olduqca böyükdür. Şuşanın işğaldan azad olunması isə tarixi əhəmiyyəti ilə təkcə Azərbaycan üçün yox, bütün türk dünyası üçün dəyərlidir. Şuşanın mənfur düşmən tapdağından azad edilməsi türk dünyasının birliyinə, dirçəlişinə yeni təkan verəcək tarixi hadisədir.

Bu sözləri AZƏRTAC-ın müxbirinə UNEC Qarabağ İqtisadi Araşdırmalar Mərkəzinin rəhbəri, professor Şəfa Əliyev deyib.

O qeyd edib ki, SSRİ-nin süqutundan sonra yenicə müstəqilliyini bərpa etmiş Azərbaycan misli görünməmiş təhdidlərlə və təhlükələrlə üzləşmişdi. Ermənistan silahlı qüvvələri havadarlarının dəstəyi və əldə etdikləri silahlarla əzəli Azərbaycan torpaqlarını işğal etdilər. Qədim mədəniyyət mərkəzimiz olan Şuşanın işğalı isə bütün türk dünyasının belini əydi. Ümummilli lider Heydər Əliyevin hakimiyyətə qayıdışından sonra ölkəmizdə bütün sahələrdə inkişaf başladı, ordumuz yenidən quruldu, “Əsrin kontraktı” imzalandı, respublikamızın beynəlxalq aləmdə nüfuzu artdı.

Şəfa Əliyev bildirib ki, Ulu Öndərin siyasətini uğurla həyata keçirən Prezident İlham Əliyevin rəhbərliyi ilə Azərbaycan özünün iqtisadi inkişaf modelini qlobal çağırışlara uyğun maksimum təkmilləşdirməyə nail oldu. Ölkənin hər yerində quruculuq işlərinə başlandı, infrastruktur bazası gücləndirildi, şəhərlər, qəsəbə və kəndlərimizin siması dəyişdi. Məcburi köçkünlər çadır şəhərciklərindən müasir və rahat yaşayış massivlərinə köçürüldü. Xalqın inamı bütün sahələrdə artmağa başladı və Qarabağın işğaldan azad olunması istiqamətində əhəmiyyətli addımlar atıldı. Milli Ordunun müasirləşdirilməsi, peşəkarlığının artırılması, müdafiə sənayesinin yaradılması, ordumuzun ən yüksək texnologiyalardan ibarət silahlarla təchiz edilməsi, onun milli ruhunun artırılması başlıca hədəflər kimi nəzərdə tutuldu və bu istiqamətlərdə əməlli addımlar atıldı.

“Bütün bunlar 2020-ci ilin sentyabrın 27-dən başlayan və 44 gün müddətində davam edən Qarabağ Zəfərində öz sözünü dedi. Rəşadətli Ordumuz Ali Baş Komandanın rəhbərliyi altında düşməni diz çökdürdü, məğlubedilməzlik mifi yaradılmış erməni hərbi birləşmələrini və silahlı qüvvələrini zəlil günə saldı. Düşmən canını qurtarmaq üçün iri texnikaları, silah və sursatları ataraq siçan kimi gizlənməyə deşik axtardı. Ermənistan rəhbərlərinin, siyasətçilərinin, dünyanın aparıcı ölkələrində olan diaspor nümayəndələrinin və rəhbərlərinin gecə-gündüz şivən salmalarına baxmayaraq, ölkəmiz xarici dairələrin təsirindən çəkinmədi və torpaqlarımızı düşməndən azad etdi”, - -deyə Şəfa Əliyev vurğulayıb.

Qarabağ İqtisadi Araşdırmalar Mərkəzinin rəhbəri deyib: “Ulu öndər Heydər Əliyev Şuşanın Azərbaycan üçün müstəsna əhəmiyyətini yüksək qiymətləndirərək bildirmişdi ki, “Şuşasız Qarabağ, Qarabağsız isə Azərbaycan yoxdur”. Prezident İlham Əliyev isə deyib: “Şuşanı dağılmış, amma, eyni zamanda, əyilməmiş, əzəmətli görmək bizi hədsiz dərəcədə qürurlandırır. Şuşa ayaqdadır, Şuşa sınmayıb, Şuşa əyilməyib! Mənfur düşmən nə qədər çalışsa da, Şuşanın simasını dəyişdirə bilməyib. Biz Şuşanın bütün yaralarını sağaldacağıq”. Türk dünyası üçün mühüm hadisələrin baş verdiyi bir şəraitdə Prezident İlham Əliyevin Sərəncamı ilə 2022-ci il “Şuşa İli” elan olundu. Sevindirici haldır ki, artıq Şuşada genişmiqyaslı bərpa və dirçəliş işləri görülür. Bir tərəfdən infrastruktur layihələri həyata keçirilir, mədəniyyət abidələri bərpa olunur, digər tərəfdən isə şuşalıların öz doğma yurdlarına qayıtması üçün evlər tikilir. Bir sözlə, Şuşa inkişaf edir, tarixi və müqəddəs simasını özünə qaytarır, həm də sürətlə dirçəlir”.

Şuşanın tezliklə nəinki regionun, eləcə də dünyanın ən cəlbedici şəhərlərindən birinə çevriləcəyinə əminliyini bildirən Şəfa Əliyev vurğulayıb ki, Şuşa Azərbaycanın, Cənubi Qafqazın mədəni, eyni zamanda, ictimai-siyasi həyatında strateji rol oynamaqla bərabər, həm də bütöv türk dünyasının coğrafiyasının birləşdirilməsində, mədəni–iqtisadi əlaqələrinin gücləndirilməsində önəmli rol oynayacaq, Türk dünyasının tarixi yüksəlişinə əsaslı töhfə verəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.