MƏDƏNİYYƏT
Uşaq yazıçısı Mehriban Nağıyeva ilə növbəti görüş
![Uşaq yazıçısı Mehriban Nağıyeva ilə növbəti görüş](/files/2021/3/1200x630/16401767364648020626_1200x630.jpg)
Bakı, 22 dekabr, AZƏRTAC
Dekabrın 22-də F.Köçərli adına Respublika Uşaq Kitabxanasının təşkilatçılığı ilə Xırdalan şəhər “Little Star” Məktəbəqədər Təhsil Mərkəzində uşaq yazıçısı Mehriban Nağıyeva ilə görüşü keçirilib.
AZƏRTAC xəbər verir ki, tədbirdə məktəbəqədər uşaqların ifasında yazıçının “Xarıbülbül və Günəşin nağılı” əsəri əsasında hazırlanmış nağıl-tamaşa təqdim edilib. Sonra uşaqlar M.Nağıyevanın “Uşaqların şeir payı” kitabından “Şuşa”, “Qarabağ”, “Qış”, “Qar dənəciyi” və digər şeirlərini söylədilər.
Kitabxananın direktoru, Əməkdar mədəniyyət işçisi Şəhla Qəmbərova tədbirdə çıxış edərək uşaqlarla yazarlar arasında keçirilən görüşlərin əhəmiyyətini vurğulayıb. Bildirdi ki, belə görüşlər uşaqlar üçün yaddaqalan bir hadisədir. Buna görə də məktəblilər hələ uzun illər xoş təəssüratla bu görüşü xatırlayacaq.
Qeyd edib ki, tədbirin keçirilməsində əsas məqsəd uşaqlara mütaliə mədəniyyəti və oxu vərdişi aşılamaqdır.
Mehriban Nağıyeva tədbirin təşkilatçılarına öz minnətdarlığını bildirib və müəllifi olduğu “Xarıbülbül və Günəşin nağılı” kitablarını balacalara hədiyyə edib.